2026-cı ilin iyun-avqust aylarında Gəncə şəhərində “Şəhid ailələrindən olan uşaqlar üçün psixoloji teatr təlimləri” layihəsi həyata keçiriləcək.
Layihə Azərbaycan Uşaq Hüquqları Müdafiəsi Liqası tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin kiçik qrant müsabiqəsi çərçivəsində icra olunur.
Layihənin əsas məqsədi şəhid ailələrindən olan 12–16 yaşlı uşaqların yaşadıqları itki və kədər hisslərini sağlam şəkildə ifadə etmələrinə, emosional dayanıqlıqlarının artırılmasına və sosial bacarıqlarının inkişafına dəstək göstərməkdir.
Layihə çərçivəsində Gəncə şəhərində yaşayan şəhid ailələrindən olan 15 uşaq üçün 5 günlük psixoloji teatr təlimləri təşkil ediləcək. Təlimlər peşəkar psixoloq və teatr təlimçisi tərəfindən Rudolf Labanın fiziki teatr metodikası əsasında keçiriləcək.
Məşğələlər zamanı iştirakçılar bədən dili, hərəkət və yaradıcı ifadə vasitələri ilə emosiyalarını tanımağı, ifadə etməyi və idarə etməyi öyrənəcəklər. Bununla yanaşı, uşaqların ünsiyyət, əməkdaşlıq və özünüifadə bacarıqlarının inkişafına da xüsusi diqqət yetiriləcək.
Layihənin yekununda iştirakçıların hazırladığı teatr tamaşası ictimaiyyətə təqdim olunacaq. Tamaşa uşaqların yaradıcı potensialını nümayiş etdirməklə yanaşı, cəmiyyətin şəhid ailələrindən olan uşaqların emosional dünyasını daha yaxından tanımasına və onların psixoloji rifahına diqqətin artırılmasına xidmət edəcək.
Qeyd edək ki, layihənin tərəfdaşı Ritual Teatr və Yaradıcılıq Laboratoriyasıdır. Azərbaycan Uşaq Hüquqları Müdafiəsi Liqası layihənin gedişi və əldə olunan nəticələr barədə ictimaiyyəti mütəmadi məlumatlandıracağını bildirib.
Təşkilat bütün maraqlı tərəfləri layihənin yekununda təqdim olunacaq tamaşada iştirak etməyə dəvət edib.
