“İndoneziya Rusiya prezidenti Vladimir Putin və ABŞ prezidenti Co Baydenin G20 sammitində görüşünü təşkil etməyə hazırdır. Təbii ki, belə bir görüş siyasətçilərin planlarına daxil olarsa”.
Azpost.info xəbər verir ki, bunu İndoneziyanın Rusiyadakı səfiri Xose Antonio Morato Tavares bildirib.
“İndoneziya bundan çox məmnun olardı. Biz bunu əvvəllər etmişik. Məsələn, Kambocada münaqişə zamanı İndoneziya Cakartada o vaxtlar fikir ayrılığı olan Vyetnam və Kamboca liderləri arasında qeyri-rəsmi görüşlərə ev sahibliyi etdi. Onlar kokteyllə başladılar və sonradan bu, münasibətlərin inkişafına təkan verdi. Ona görə də, bunun dərhal nəyisə həll edəcəyinə söz vermirik. Lakin sadə ünsiyyət müzakirələri irəli aparmağa kömək edə bilər”, – Tavares qeyd edib.
Səfirin sözlərinə görə, sammitdə iştirak üçün artıq Rusiya prezidentinə dəvət göndərilib.
Azpost.info
