Gənc İlham Əliyev və Müslüm Maqomayev evdə bayram süfrəsində
Korifey sənətkarımız Müslüm Maqomayevlə bağlı hər bir məqam bir xatirəni saxlayır.
Onun Azərbaycan mədəniyyətinin keçmiş SSRİ-də, Avropada tanınmasında misilsiz xidməti olub. Bu istedadın tanınmasında mərhum prezident Heydər Əliyevin də böyük dəstəyi olub. Böyük sənətkarın Ulu öndər Heydər Əliyevlə ailəvi dostluğu barədə dəfələrlə danışılıb.
AzPost “FOTOXRONİKA” layihəsi çərçivəsində təqdim etdiyi şəkildə həmin günlərin xoş dəqiqələri əks edilib.
Süfrə başında gənc İlham Əliyev, bacısı Sevil Əliyeva və Müslüm Maqomayev oturub. Foto 1970-ci illərin sonlarında çəkilib.
Prezident İlham Əliyev öz çıxışlarında Müslüm barədə həmişə böyük ehtiramla danışıb. “Biz onunla çox yaxın dost olmuşuq, bir-birimizə böyük rəğbət və hörmətlə yanaşmışıq”deyə dövlət başçısı çıxışlarının birində deyib.
“Müslüm gözəl insan idi. Bir şəxsiyyətdə həm insani, həm yaradıcı keyfiyyətlərin cəmləşməsi çox nadir haldır. Bu günə qədər heç kəs Müslümün mahnılarını onun özü kimi ifa edə bilmir”.
Dövlət başçısı 2022-ci ildə Bakının Dənizkənarı Milli Parkında Müslüm Maqomayevin abidəsinın açılış mərasimindəki çıxışında bunları söyləyib: “Hər birimiz Müslümü məhz həm böyük sənətkar, müğənni, bəstəkar və ən başlıcası, gözəl insan, ləyaqətli insan, çox etibarlı dost kimi tanıyırdıq. Bizim aramızda yaş fərqi böyük olsa da, bu, heç vaxt hiss olunmurdu. Çünki biz uzun illər dostluq əlaqələri saxlayırdıq. Son görüşümü də Mehribanla Moskvada Müslümün və Tamaranın evində xüsusilə xatırlayıram. Artıq Müslümün səhhəti o qədər də yaxşı deyildi, problemlər var idi, ancaq buna baxmayaraq, bizi çox səmimiyyətlə qarşıladı və biz bir neçə saat onların evində olarkən çox səmimi söhbətlər etdik, keçmişi xatırladıq, atamı, rəhmətlik anamı xatırladıq, o gözəl günləri xatırladıq və Mehribanla çox duyğulandıq”.
Dövlət başçısı Müslüm Maqomayevlə son görüşü barədə söhbətini belə davam etdirib: “Bildiyiniz kimi, son illər Müslümün ayaqlarında müəyyən problemlər var idi. Ancaq o qədər səmimi atmosfer var idi ki, hətta sonra bəlli oldu, uzun illər evdən çıxmayan Müslüm bayıra çıxdı, bizi yola saldı. Ağlımıza gəlməzdi ki, bu, bizim son görüşümüz idi”.
“Müslümün bizi çox tez tərk etməsindən kədərlənirik. Müslüm bizim ürəyimizdə, xatirəmizdə, dostlarının yaddaşında yaşayır. Müslümü Azərbaycanda seviblər, sevirlər və bundan sonra da əbədi olaraq sevəcək və xatırlayacaqlar”.
Azpost.info
