“Google” “Gemini” tətbiqində abunə planlarına uyğun olaraq istifadəçilərin çıxış əldə edə biləcəyi süni intellekt modellərində dəyişiklik edir.
Valyuta.az xəbər verir ki, şirkətin yenilənmiş dəstək səhifəsinə əsasən, dəyişiklik pulsuz istifadəçilər üçün 9 oktyabrdan qüvvəyə minəcək.
Bundan sonra pulsuz hesablar “Gemini 3.6 Flash” və “Gemini 3.1 Pro” modellərinə çıxışı itirəcək və yalnız “Gemini 3.5 Flash-Lite” modelindən istifadə edə biləcək. Beləliklə, pulsuz istifadəçilərin müxtəlif modellər arasında seçim imkanı aradan qalxacaq.
“Google AI Plus” abunəçiləri “Flash-Lite” və “Flash” modellərindən istifadə etməyə davam etsələr də, “Pro” modelinə çıxışları dayandırılacaq. Şirkət bu dəyişikliyin tətbiq tarixini hələ açıqlamayıb və istifadəçilərin elektron poçt vasitəsilə məlumatlandırılacağını bildirib.
“Google AI Pro” və “AI Ultra” abunəçilərinin mövcud modellərə çıxışında isə məhdudiyyət olmayacaq. Hər iki plan “Flash-Lite”, “Flash” və “Pro” modellərini təqdim etməyə davam edəcək.
Bununla yanaşı, “AI Pro” istifadəçilərinə “Deep Think” funksiyası da təqdim olunacaq. Daha əvvəl daha bahalı abunə planlarında mövcud olan bu funksiya mürəkkəb tapşırıqların həlli zamanı paralel düşünmə imkanından istifadə edir.
Yeni dəyişikliklə “Gemini”də hər model üçün aşağı, orta və yüksək olmaqla üç düşünmə səviyyəsi də təqdim ediləcək. Daha yüksək səviyyə daha ətraflı cavabların hazırlanmasına imkan versə də, istifadə limitinin daha sürətli tükənməsinə səbəb olacaq.
“Google”un yeni flaqman süni intellekt modeli “Gemini 4 Argon”un bu sistemdə hansı kateqoriyada yer alacağı isə hələ açıqlanmayıb.
