Gürcüstanın sabiq baş prokuroru Otar Partsxaladze Rusiyanın tərəfində Ukraynaya qarşı müharibədə iştirak etmək üçün yaradılan könüllü dəstəyə rəhbərlik edir.
Azpost.info bildirir ki, o, bu barədə Rusiyanın TASS dövlət agentliyinə açıqlamasında məlumat verib.
Pattrsxaladzenin rəhbərlik etdiyi dəstə “Georgiyevski” adlanır. Onun sözlərinə görə, ad 1783-cü ildə imzalanmış Georgiyevski traktatının şərəfinə seçilib. Bu müqavilə Rusiya imperiyasının Gürcüstan üzərində himayəsini nəzərdə tuturdu.
Dəstə özünü “könüllü və beynəlmiləl” birlik kimi təqdim edir. Onun şəxsi heyətinin sayı və tərkibi barədə məlumat açıqlanmayıb. “Dəstənin əsas vəzifəsi təkcə bizə deyil, bütün dünyaya təhlükə yaradan şərə qarşı mübarizəni sona çatdırmaqdır”, – Partsxaladze bildirib.
Pattrsxaladze Rusiyanı vətəni adlandırsa da, Tbilisidə doğulub. Onun gürcü soyadına “Romanov” əlavəsi 2023-cü ildə ABŞ-ın ona qarşı sanksiya tətbiq etməsindən sonra yaranıb.
ABŞ Dövlət Departamenti həmin vaxt Rusiya Federal Təhlükəsizlik Xidmətinin Partsxaladzedən Gürcüstan siyasətinə təsir göstərmək üçün istifadə etdiyini bildirmişdi. Sanksiyaların səbəbləri arasında onun Rusiya pasportu almasına kömək edildiyi iddiası da yer alırdı.
2023-cü ilin oktyabrında Gürcüstan Prezidenti Salome Zurabişvili Partsxaladzenin vətəndaşlığının ləğvi barədə fərman imzalayıb. 2025-ci ilin iyununda isə o, Gürcüstanı tərk edərək Rusiyada məskunlaşıb. Gürcüstan parlamentinin sədri Şalva Papuaşvili Partsxaladzenin Rusiya-Ukrayna müharibəsi ilə əlaqədar sanksiya siyahısına salınan ilk Gürcüstan vətəndaşı olduğunu bildirib.
Gürcüstan hakimiyyətinə yaxın fiqur
Pattrsxaladze vaxtilə Gürcüstan hakimiyyətinə ən yaxın şəxslərdən biri hesab olunurdu. O, 2013-cü ildə ölkənin baş prokuroru təyin edilib, lakin vəzifəsində iki aydan az qalıb. Müxalifət onun Almaniyada 2001-ci ildə oğurluq ittihamı ilə məhkum edildiyini açıqladıqdan sonra istefa verməyə məcbur olub. Almaniya məhkəməsi onun 2016-cı ilin avqustuna qədər rəsmi vəzifə tutmasını qadağan etmişdi.
Pattrsxaladzenin vəkili isə qərarın yalnız Almaniyadakı vəzifələrə aid olduğunu bildirmişdi.
