Valideynlərin uşaqlara aldıqları hədiyyələrin qiymətini tez-tez xatırlatması onların psixoloji vəziyyətinə mənfi təsir göstərə bilər. Bu, uşağın öz səhvlərini valideynlərindən gizlətməsinə, başına gələn xoşagəlməz hadisələr barədə danışmaqdan çəkinməsinə səbəb ola bilər.
Bu barədə Rusiya Maliyyə Universitetinin Humanitar elmlər kafedrasının assistenti, psixoloq Yaroslav Klimov “RİAMO”ya açıqlamasında bildirib.
Onun sözlərinə görə, valideynlər uşağa əşyanın qiymətini xatırladanda uşaq çox vaxt faydalı dərsi deyil, böyüyün qəzəbini yadda saxlayır.
Psixoloq hədiyyələrin qiyməti barədə uşaqlarla danışmağın mümkün olduğunu, lakin belə söhbətlərin günahkarlıq hissi yaratmaq və ya uşağı valideynləri qarşısında borclu hiss etdirmək məqsədi daşımamalı olduğunu vurğulayıb.
Klimovun fikrincə, xərclənən pulu tez-tez xatırlatmaq əvəzinə, uşağa bahalı texnikanı niyə nəzarətsiz qoymamağın, ona necə qulluq etməyin və nasazlıq yarandıqda nə etməyin lazım olduğunu izah etmək daha doğrudur.
Mütəxəssis uşağın yaşını da nəzərə almağın vacibliyini qeyd edib. Onun sözlərinə görə, kiçik məktəbyaşlı uşaqlar hesablamağı bacarsalar belə, bahalı əşyaların real dəyərini hər zaman dərk edə bilmirlər. Yeniyetmələr isə hədiyyənin qiymətini ailənin digər xərcləri ilə müqayisə etmək qabiliyyətinə malikdirlər.
Psixoloq valideynlərə xərclənən pulları uşaqlara davamlı xatırlatmaqdan çəkinməyi tövsiyə edib. Çünki hər mübahisədə hədiyyənin qiymətinin gündəmə gətirilməsi uşağın valideyn qayğısını sevgi və diqqət deyil, ödənilməli bir borc kimi qəbul etməsinə səbəb ola bilər.
Klimovun fikrincə, hədiyyənin qiyməti barədə söhbətin məqsədi uşağa əşyalara daha diqqətlə yanaşmağı öyrətmək olmalıdır, onda valideynləri qarşısında borcluluq hissi yaratmaq yox.
