Alimlər müəyyən ediblər ki, insan həyatı boyu iki əsas dövrdə özünü daha xoşbəxt hiss edir. Araşdırmanın nəticələrinə görə, bu zirvələr təxminən 23 və 69 yaşlara təsadüf edir.
Tədqiqat çərçivəsində yaşı 17-85 arasında dəyişən 23 min nəfərin məlumatları təhlil edilib. İştirakçılar hər beş ildən bir həyatlarından məmnunluq səviyyəsini qiymətləndirən sorğularda iştirak ediblər.
23 yaş – ümidlər və yeni imkanlar dövrü
Mütəxəssislərin fikrincə, ilk xoşbəxtlik zirvəsi təxminən 23 yaşda yaşanır. Bu dövrdə insanlar adətən ciddi ailə və maliyyə öhdəlikləri daşımır, peşəkar həyatlarının başlanğıcında olur və gələcəklə bağlı böyük ümidlər bəsləyirlər.
Yeni tanışlıqlar, özünü reallaşdırmaq istəyi və macəra axtarışı gənclərdə həyata bağlılıq hissini gücləndirir.
69 yaş – daxili rahatlıq dövrü
Araşdırmaya görə, ikinci xoşbəxtlik zirvəsi təxminən 69 yaşda müşahidə olunur.
Pensiyaya çıxan insanlar daha çox boş vaxta sahib olur, ailələrinə, hobbilərinə və əvvəllər vaxt ayıra bilmədikləri məşğuliyyətlərə üstünlük verirlər. Bu yaşda övladlar artıq müstəqil olur, gündəlik qayğılar azalır və insanlar həyatın kiçik sevinc mənbələrindən daha çox zövq almağa başlayırlar.
Dəyərlər dəyişir
Psixoloqlar bildirirlər ki, yaş artdıqca insanların həyata baxışı da dəyişir. Xarici uğurlar və maddi nailiyyətlər əvvəlki qədər önəm daşımır, onların yerini daxili rahatlıq, ailə münasibətləri və sadə həyat anlarından alınan məmnunluq tutur.
Xoşbəxtliyə nə təsir edir?
Ekspertlər hesab edirlər ki, yaşlı dövrdə xoşbəxtlik hissinin yüksək olmasına möhkəm sosial münasibətlər, aktiv həyat tərzi, maraq dairəsinin genişliyi və sağlam vərdişlər mühüm təsir göstərir.
Araşdırma göstərir ki, sağlam həyat tərzi sürən və yaxınları ilə əlaqələrini qoruyan insanlar yaşlandıqca həyatlarından daha çox məmnun olurlar.
