HƏMAS-ın hücumundan sonra dünyanın ən böyük kriptovalyuta birjası “Binance”da 100-dən çox hesab İsrail hüquq-mühafizə orqanlarının göstərişi ilə bağlanıb.
Azpost.info xəbər verir ki, İsrail hakimiyyət orqanları milyonlarla dollar kriptovalyuta ələ keçirib və daha 200-ə yaxın hesab haqqında məlumat araşdırılır.
Bu barədə məlumatlı mənbələr “Financial Times”a bildiriblər.
İsrailin Milli Kiberidarəetmə Qurumunun icraçı direktoru Tom Aleksandroviçin sözlərinə görə, HƏMAS və digər qruplarla əlaqəli hesablara daxil olan kriptovalyuta fondlarının həcmi hücumdan sonra kəskin artıb. Oktyabrın 7-dən bəri HƏMAS-a ianə toplamaq üçün təxminən 150 kampaniya müəyyən edilib.
Aleksandroviç kriptovalyutaları müharibənin indiki mərhələsində terrorizmi maliyyələşdirməyin əsas yolu adlandırıb.
İsrail polisi ötən həftə HƏMAS-ın vəsait toplamaq üçün istifadə etdiyi kriptohesablarını dondurduqlarını açıqlamışdı.
Sanksiyalar və qaydalara uyğunluq prosedurları ilə tanış olan “Binance” əməkdaşı “Financial Times”a bildirib ki, İsrail hüquq-mühafizə orqanları yüzlərlə hesab haqqında məlumat tələb edib.
Azpost.info
