“Hicab örtməyənləri dinsizlikdə ittiham etmək olmaz” –

İranın Ali Rəhbəri Əli Xameneyi ölkədə qadınların hicabın taxılması barədə sərt qaydalarla bağlı mövqeyini açıqlayıb.

Azpost.info IRNA-ya istinadən xəbər verir ki, Xamenei mədəni, ictimai və elmi sahələrdə fəaliyyət göstərən bir qrup qadınla görüşü zamanı bu barədə danışıb.

Onun sözlərinə görə, İranda tələb edildiyi kimi, hicabla başını tam örtməyən qadınları dinsizlikdə və inqilaba qarşı olmaqda ittiham etmək olmaz: “Hicabda zəiflik o demək deyil ki, bu adamı dindən çıxarılmalıdır. Hamımız çatışmayan cəhətlərə sahibik, bunları mümkün olduğu qədər aradan qaldırmalıyıq. Hicabı düzgün geyinməyən qadınlar da bizim qızlarımızdır”, – deyə Xamenei bildirib.

Qeyd edək ki, ötən ilin sentyabrında 22 yaşlı Məhsa Əmininin hicabını düzgün taxmadığı iddiası ilə əxlaq polisi tərəfindən zorakılığa məruz qalması və dünyasını dəyişməsindən sonra İran rəhbərliyi bir çox ölkələr tərəfindən tənqid olunub. Bir çox qurum və təşkilatlar İranı qadınların hüquq və azadlıqlarını təmin etməyə çağırıb. Qadınlar ölkə rəhbərliyinin qadınlara qarşı sərt siyasətinə qarşı etiraz aksiyalarına başlayıb.