İran Prezidenti Məsud Pezeşkian bildirib ki, Fars körfəzinin və onun su yollarının uzunmüddətli təhlükəsizliyi və inkişafı region ölkələrinin əməkdaşlığından, ortaq məsuliyyətindən və fəal iştirakından asılıdır. Bu barədə “Tasnim” məlumat yayıb.
Pezeşkian Ümumdünya Dəniz Günü münasibətilə müraciətində dənizin İranın tarixinin, mədəniyyətinin və iqtisadiyyatının ayrılmaz hissəsi, eləcə də ölkənin bu günü və gələcəyi üçün mühüm resurs olduğunu bildirib. Onun sözlərinə görə, İranın şimal və cənubdakı uzun sahil xətti, həmçinin əsas dəniz marşrutları üzərində strateji mövqeyi ölkəni gəmiçilik və ticarətin mühüm mərkəzinə çevirib.
İran prezidenti qeyd edib ki, dəniz daşımaları iqtisadi artımda, regionların inkişafında, iş yerlərinin yaradılmasında və beynəlxalq əlaqələrdə mühüm rol oynayır. Onun sözlərinə görə, təhlükəsizlik və inkişaf bir-birindən ayrılmazdır: təhlükəsiz dənizlər, limanlar və gəmiçilik marşrutları ticarət və iqtisadi fəallığı dəstəkləyir, iqtisadi inkişaf isə dövlətin imkanlarını gücləndirir.
Pezeşkian bildirib ki, İran regional su yollarının təhlükəsizliyini və sabitliyini təmin etmək, həmçinin gəmiçilik və ticarəti qorumaq niyyətindədir. Bunun üçün ölkənin hərbi-dəniz qüvvələrinin imkanlarından və dənizçilik sahəsində mütəxəssislərin təcrübəsindən istifadə ediləcək.
O, xüsusilə Hörmüz boğazına toxunaraq, bu ərazini dünyanın ən mühüm dəniz keçidlərindən biri adlandırıb. Prezidentin sözlərinə görə, boğaz regional və qlobal təhlükəsizlik və iqtisadiyyatda mühüm rol oynayır. İranın bu strateji su yoluna yanaşması məsuliyyət, təhlükəsizliyin, sabitliyin və region ölkələrinin maraqlarının qorunması prinsiplərinə əsaslanır.
Pezeşkian həmçinin ötən il ərzində ölkənin həyati əhəmiyyətli dəniz kommunikasiyalarının fəaliyyətini təmin edən iranlı dənizçilərə təşəkkür edib. Onun sözlərinə görə, yaranmış çətinliklərin öhdəsindən hökumətin, özəl sektorun və təhlükəsizlik qüvvələrinin qarşılıqlı fəaliyyəti nəticəsində gəlmək mümkün olub.
İran prezidenti dəniz tədqiqatlarına, texnologiyalara, infrastruktura və təhlükəsizliyə investisiyaların artırılmasına çağırıb. O, həmçinin gəmiçilik şirkətlərinin, balıqçılıq icmalarının, liman operatorlarının, dəniz sənayesi müəssisələrinin, universitetlərin və sahilyanı rayonların sakinlərinin bu sahənin inkişafına daha fəal cəlb edilməsinin vacibliyini vurğulayıb.
Sonda Pezeşkian dənizçiləri və dənizçilik sahəsində çalışanları Ümumdünya Dəniz Günü münasibətilə təbrik edib və xidməti vəzifələrini yerinə yetirərkən həlak olanların xatirəsini yad edib.
