İslam Əməkdaşlıq Təşkilatının Əmək Mərkəzinin (İƏT Əmək Mərkəzi) dəvəti ilə Seneqal Respublikasının Dövlət Qulluğu, Əmək və Dövlət Xidmətinin İslahatı naziri Mamadou Lamine Diantenin rəhbərlik etdiyi nümayəndə heyəti Azərbaycanda işgüzar səfərdə olub.
Səfər Azərbaycan və Seneqal arasında institusional əlaqələrin gücləndirilməsi, müvafiq sahələrdə təcrübə mübadiləsi və əməkdaşlıq imkanlarının genişləndirilməsi məqsədi daşıyır.
Səfər çərçivəsində İƏT Əmək Mərkəzinin Baş direktoru Azər Bayramov ilə Seneqalın Dövlət Qulluğu, Əmək və Dövlət Xidmətinin İslahatı naziri Mamadou Lamine Dianté arasında ikitərəfli görüş keçirilib. Görüşdə əməyin təhlükəsizliyi və sağlamlığı sahəsində əməkdaşlığın genişləndirilməsi, eləcə də 2027-ci ildə Dakar şəhərində keçiriləcək Əməyin Təhlükəsizliyi və Sağlamlığı üzrə 24-cü Dünya Konqresinə hazırlıq məsələləri müzakirə olunub.
Görüşün ardından İƏT Əmək Mərkəzi ilə Seneqal Respublikasının Dövlət Qulluğu, Əmək və Dövlət Xidmətinin İslahatı Nazirliyi arasında Əməyin Təhlükəsizliyi və Sağlamlığı üzrə 24-cü Dünya Konqresi çərçivəsində strateji tərəfdaşlığa dair Anlaşma Memorandumu imzalanıb.
Memorandumu İƏT Əmək Mərkəzinin Baş direktoru Azər Bayramov və Seneqalın Dövlət Qulluğu, Əmək və Dövlət Xidmətinin İslahatı naziri Mamadou Lamine Dianté imzalayıb.
Anlaşma Memorandumu İƏT Əmək Mərkəzinin 26–30 aprel 2027-ci il tarixlərində Dakar şəhərində keçiriləcək Dünya Konqresində Strateji Tərəfdaş qismində iştirakını, həmçinin əməyin təhlükəsizliyi və sağlamlığı sahəsində əməkdaşlığın əsas istiqamətlərini müəyyən edir.
Strateji tərəfdaşlıq çərçivəsində rəqəmsallaşma və süni intellektin əməyin təhlükəsizliyi və sağlamlığına təsiri, bu sahədə tədqiqat, texniki əməkdaşlıq və praktiki həllərin inkişafı diqqət mərkəzində olacaq.
Qeyd edək ki, baş qərargahı Bakı şəhərində yerləşən İƏT Əmək Mərkəzi 2024-cü ildən fəaliyyət göstərən beynəlxalq hökumətlərarası qurumdur. Mərkəzin fəaliyyəti İslam Əməkdaşlıq Təşkilatının 57 üzv dövlətini əhatə edir və əmək, məşğulluq, sosial müdafiə və insan kapitalının inkişafı sahələrində əməkdaşlığın gücləndirilməsinə xidmət edir.
