Azərbaycanda qeyri-formal təhsilə dəstək vermək məqsədilə təhsil mühitinə və gənclərlə iş sektoruna mühüm töhfə olacaq yeni nəşr “Qeyri-formal təhsildə təlimçinin əl kitabı” oxuculara təqdim olunub.
Metodiki və praktiki vəsait qeyri-formal təhsil sahəsində çalışan təlimçilər üçün nəzərdə tutulmuş geniş metodik bələdçi, müxtəlif istiqamətlərdə təlim sessiyaları təşkilatçıları, təlimçi və fasilitatorlar, gənclərlə işləyən mütəxəssislər, sosial layihə rəhbərləri, təhsil təşkilatçıları və könüllü fəaliyyət koordinasiyaçıları, o cümlədən də təhsilin müxtəlif səviyyələrinqəümumi orta və ali təhsil müəllimləri üçün də qiymətli praktik qaynaqdır.
Vəsaitdə qeyri-formal təhsilin nəzəri əsaslarından başlayaraq, təlimçi səriştələri, öyrənmə üslubları, təlimin planlaşdırılması, fasilitasiya üsulları, qiymətləndirmə metodları, münaqişələrin idarə olunması və media savadlılığı kimi mövzular geniş şəkildə işıqlandırılır. Oxucular burada 250-dən çox müxtəlif interaktiv fəaliyyət nümunələri, oyunlar, hərəkətləndiricilər və təlim sessiyalarının və təlimin qurulmasında onlara lazım olacaq praktiki sənəd formaları da tapa bilərlər. Kitabın əsas üstünlüyü nəzəri biliklərlə yanaşı, dərhal tətbiq oluna biləcək praktik alətləri təqdim etməsidir.
Vəsait təlimlərin daha yaradıcı, iştirakçı yönümlü və nəticəyönümlü keçirilməsinə imkan yaradır. Eyni zamanda yerli təcrübələr və gənclərlə işdə istifadə oluna biləcək real nümunələr kitabın dəyərini artırır. Belə ki, təlimçilər, təhsil işçiləri və bu qəbildən olan peşə sahibləri kitabı gündəlik yol yoldaşı kimi öz çantalarında gəzdirə, lazımi məqamlarda rahat şəkildə istifadəm edə bilir.
Kitabın müəllifləri uzun illərdir təlimçilik, gənclərlə iş və təhsil sahəsində fəaliyyət göstərən Zamin Məmmədov, Ülvi Məmmədov və Elnur Arifzadədir. Onlar müxtəlif beynəlxalq proqramlarda, forumlarda, təlim kurslarında və yerli layihələrdə təlimçiliklə bağlı qazandıqları önəmli və zəngin təcrübəni bu nəşrdə bir araya gətiriblər.
Nəşrdə həmçinin beynəlxalq təşkilatların, qeyri-formal təhsil məktəblərinin, sahə mütəfəkkirlərinin metodik materiallarının uyğunlaşdırılmış hissələri də yer alır. Yerli müəlliflər tərəfindən hazırlanmış bu ilk sistemli vəsaitin sektorda boşluğu əhəmiyyətli dərəcədə dolduracağı gözlənilir.
Kitabı əldə etmək üçün müəlliflərin özləri ilə əlaqə saxlamaq lazımdır. Yaxında kitab mağazalarından da almaq mümkün olacaq.
