Pakistanın Pəncab əyalət polisi ölkənin keçmiş Baş naziri İmran Xanın iqamətgahına basqın edib.
Azpost.info xəbər verir ki, təhlükəsizlik qüvvələri 40-dan çox müxalifət tərəfdarını həbs edib.
Telekanalın məlumatına görə, İmran Xan hazırda İslamabad Rayon Məhkəməsinə aparılır və orada dövlət vəzifəsində işlədiyi müddətdə aldığı bahalı hədiyyələrin itməsi ilə bağlı məhkəmə iclası keçiriləcək. İddia olunur ki, məlum hədiyyələrin hesabına Xan 630 min dollar qazanıb.
İmran Xan öz “Tviter” hesabında təhlükəsizlik qüvvələrinin hərəkətlərini sərt tənqid edib.
Bu gün səhər saatlarında polis İmran Xan tərəfdarlarının qurduğu çadırları sökməyə başlayıb. Müxalif fəallar molotov kokteylindən istifadə edərək müqavimət göstərməyə başlayıblar.
İqamətgaha aparan darvazanı sökmək üçün hüquq-mühafizə orqanlarının əməkdaşları buldozerdən istifadə ediblər. Hazırda sabiq baş nazirin evinə bitişik ərazidə müxaliflərlə toqquşmalar davam edir.
İmran Xan Pakistanın baş naziri olub və ötən ilin aprelində etimadsızlıq səsverməsindən sonra vəzifədən gedib. May ayında o, hakimiyyətə qayıtmaq üçün kampaniya başladıb. “Uzun yürüş”ün kütləvi mitinqləri növbə ilə ölkənin 15 şəhərində keçirilib.
Qeyd edək ki, 2022-ci ilin noyabrında Xan partiyasının nümayəndələrinin erkən seçkilərin keçirilməsi tələbilə keçirdiyi etiraz yürüşündə sui-qəsdə məruz qalaraq güllə yarası alıb.
Azpost.info
