İran nüvə
İran ABŞ-la razılaşma əldə olunacağı təqdirdə 60 faizə qədər zənginləşdirilmiş uran ehtiyatını azaltmağa və durultmağa hazırdır.
Bunu İran Prezidenti Məsud Pezeşkian Fox News telekanalına müsahibəsində deyib. O bildirib ki, Tehran beynəlxalq hüquq və Nüvə Silahlarının Yayılmaması Müqaviləsi (NPT) çərçivəsində üzərinə düşən öhdəliklərə əməl etməyə hazırdır.
Pezeşkianın sözlərinə görə, İran daha əvvəl də bu materialın ehtiyatını əhəmiyyətli dərəcədə azaltmağa və zənginləşdirilmiş uranı durultmağa hazır olduğunu bildirib.
İran lideri ölkəsinin nüvə silahı yaratmağa çalışdığını da təkzib edib. “Xeyr, qətiyyən”, – Pezeşkian nüvə bombası istəyib-istəmədikləri ilə bağlı suala cavab verib.
O, İranın ali dini liderinin kütləvi qırğın silahlarının əldə edilməsini dini baxımdan qanunsuz hesab etdiyini də bildirib. Pezeşkian İranın nüvə proqramının dinc məqsəd daşıdığını vurğulayıb.
İranın 60 faizə qədər zənginləşdirilmiş uran ehtiyatı ABŞ-la Tehran arasındakı danışıqların əsas məsələlərindən biridir. Pezeşkian son açıqlamasında İranın nüvə proqramına beynəlxalq yoxlamalara imkan verməyə də hazır olduğunu bildirib.
Bu açıqlama ABŞ-İran arasında diplomatik təmasların davam etdiyi bir vaxtda səslənib. Sentyabrın 22-də ABŞ Prezidenti Donald Tramp da İranla danışıqların davam etdiyini və tərəflərin razılaşmaya gələ biləcəyini bildirmişdi.
