İrşad electronics
Vətəndaş İrşad mağazasından aldığı məişət texnikası ilə bağlı narazılığını ictimaiyyətə çatdırıb.
Hövsan filialından 26 may 2025-ci ildə Beko markalı paltaryuyan maşın alan Adilə Qurbanova bildirib ki, üç ay sonra cihazın poroşok tökülən hissəsindən su axmağa başlayıb.
Onun sözlərinə görə, servisə müraciət etsə də, problem hələ də həll olunmayıb: “Servis əməkdaşları 15 gün sonra gəldilər, qısa müddət yoxladılar və heç bir nasazlıq tapmadılar. Onlar gedən kimi yenidən su axmağa başladı. Təkrar çağıranda artıq gördülər ki, həqiqətən su sızır, amma yenə də ‘gözümüzlə görməliyik’ deyərək məsələni rəsmi qeydə almadılar. Video çəkib göndərdim, amma heç bir xeyri olmadı. Servis kağızında “qüsur yoxdur” yazılıb”.
Adilə Qurbanova qeyd edib ki, artıq bir aydır qaynar xəttə müraciət etsə də, nəticə yoxdur. “Nə servis təmir edir, nə mal dəyişdirilir, nə də geri qaytarılır. Mənim həm maddi, həm də mənəvi ziyanım var. Qüsurlu mal satılıb, amma məsuliyyəti üzərlərinə götürmürlər”, – deyə şikayətçi vurğulayıb.
Narazı müştəri başına gələn hadisə ilə bağlı AzPost-a müraciət edərək köməklik istəyib.
