İsrail diplomatik kanallar vasitəsilə Rusiyaya xəbərdarlıq göndərib.
Azpost.info xəbər verir ki, buna səbəb HƏMAS-ın hücumuna Moskvanın reaksiyasıdır.
“Kan”ın yazdığına görə, narazılıq bəyanatı bir neçə gün əvvəl Moskvaya göndərilib. İsrailin hakim “Likud” partiyasının üzvü Əmir Veytman isə Qərb ölkələrinin yekdilliklə terrorçu kimi tanıdığı HƏMAS-ı dəstəklədiyinə görə Kremlin hesab verəcəyini deyib.
İsraildə hesab edirlər ki, Rusiyada Z-təbliğatçıları HƏMAS-ı açıq şəkildə dəstəkləyir, rəsmilər isə gizli şəkildə İsrail ordusunun Qəzza zolağındakı hərəkətlərini pisləyirlər.
“Rusiyanın davranışı və xüsusən də İsraili pisləyən bəyanatlar Təl-Əvivin düşdüyü vəziyyətin ciddiliyinə, yəni müharibə vəziyyətinə uyğun gəlmir”, – nəşr İsrail diplomatlarının Moskvaya göndərdiyi mesajdan sitat gətirir.
Anti-Rusiya sanksiyalarına qoşulmayan İsraildə qəzəb Rusiya prezidenti Vladimir Putinin Qəzza zolağının mühasirəsini “qəbuledilməz” adlandıraraq, orada iki milyon insanın yaşadığını əsas gətirən bəyanatlarından qaynaqlanıb. Putinin sözlərinə görə, onların heç də hamısı HƏMAS-ı dəstəkləmir.
Azpost.info
