İstifadəçi Leo Bankın “Sərmayələr” bölməsində Doge Coin əməliyyatı zamanı problemlə üzləşib. O bildirib ki, 0.12 qiymətində sifariş yaratmağa çalışıb, amma texniki xətaya görə əməliyyat təsdiqlənməyib.
AzPost xəbər verir ki, növbəti sifariş verərkən qiymət artıq 0.14 olub. Hazırda sifariş 12 saatdır təsdiqlənməyib və bank tərəfindən bildirilib ki, müraciətə 5 iş günü ərzində baxılacaq, əgər təsdiqlənməsə, pul balansına geri qaytarılacaq.
İstifadəçi narazılığını bildirərək qeyd edib ki, bu gecikmə səbəbindən bazardakı ani dəyişikliklər onun potensial gəlirini də azaldıb. “Doge Coin qiyməti 0.19-dan yuxarı olub, əgər sifarişim vaxtında təsdiqlənsəydi, xeyrim olacaqdı. Leo Bankın sistemi ani alış-satış üçün qeyri-peşəkardır,” – deyə o vurğulayıb.
Bankion məsələ ilə bağlı açıqlama yayıb. Qeyd olunub ki, əməliyyat zamanı qlobal kriptovalyuta platformalarında yüksək yüklənmə müşahidə olunub və bu səbəbdən əməliyyatlarda gecikmələr yaranıb. “Sorğunuz düzgün şəkildə sistemdə qeydə alınıb, lakin xarici likvidlik provayderləri səbəbindən icra dayandırıla bilərdi. Gecikmələrin qarşısını almaq üçün texniki optimallaşdırmalar aparılır,” – deyə bankın açıqlamasında bildirilib.
Bank həmçinin istifadəçilərə xəbərdarlıq edib ki, oxşar halların qarşısını almaq üçün sistemin dayanıqlığını artırmaq, gecikmələr barədə avtomatik bildirişlər göndərmək və əməliyyatların icra vaxtını azaltmaq üçün texniki tədbirlər görülür.
İstifadəçilər isə bildirib ki, ani bazar dəyişiklikləri zamanı belə gecikmələr sərmayələr üçün risk yaradır və bankın sistemində təkmilləşdirmələrə ehtiyac var.
