Kontak Home mağazasından “Samsung A26” markalı telefon alan müştəri mağazanın satış prosesində şəffaflığa əməl etmədiyini iddia edir.
AzPost bildirir ki, müştəri sadəcə “qızıl zəmanət” xidmətinə razı olduğunu desə də, evə qayıtdıqdan sonra alqı-satqı müqaviləsində əlavə ödənişli xidmətlərin də daxil edildiyini öyrənib.
Şikayətdə qeyd olunur ki, telefon təxminən 630 manat dəyərində olub, lakin sənəddə göstərilən ümumi məbləğ bundan xeyli çoxdur. Müştərinin sözlərinə görə, telefon alındıqda əlavə xidmətlər və ya paketlər barədə məlumat verilməyib və alıcı da müqaviləni diqqətlə oxumadığı üçün sonradan əlavə ödənişlərin olduğunu evdə öyrənib.
Daha sonra mağazaya yaxınlaşaraq bu əlavələrin ləğvini tələb edən müştəriyə bildirilib ki, yalnız “qızıl zəmanət” silinə bilər, digər paketlər “paketə daxildir” adı ilə silinə bilməz. Alıcının fikrincə, bu, müştərinin hüquqlarının pozulmasıdır və xüsusilə məlumatlı olmayan vətəndaşlar bu şəkildə aldadılır.
Telefon və əlavə paketlər qaytarıla və ya ləğv oluna bilərmi?
Azərbaycan qanunvericiliyinə əsasən, istehlakçı malı aldıqdan sonra 14 gün ərzində malın istifadə edilmədiyi halda geri qaytarılması hüququna malikdir. Bu halda, əgər telefon istifadə edilməyibsə və ilkin vəziyyətini qoruyubsa, satıcı cihazı geri qəbul etməli və əlavə xidmətləri də ləğv etməlidir. Əks halda, bu, “İstehlakçıların Hüquqlarının Müdafiəsi” haqqında Qanunun pozuntusu hesab oluna bilər.
Ekspertlər bildirirlər ki, müştəriyə ödənişli xidmətlər barədə əvvəlcədən açıq məlumat verilməli və yazılı razılıq alınmalıdır. Əgər bu baş verməyibsə, müştəri müvafiq qurumlara – Antiinhisar və İstehlak Bazarına Nəzarət Dövlət Xidmətinə və ya məhkəməyə müraciət edə bilər.
Kontak Home şikayətə cavab verərək bildirir ki, məsələ araşdırılır və müştəriyə geri dönüş ediləcək.
Bu cür hallarla qarşılaşan vətəndaşlara tövsiyə olunur ki, hər hansı müqaviləni imzalamazdan əvvəl onun şərtlərini tam oxusunlar və suallar yarandıqda satış məsləhətçilərindən yazılı izah tələb etsinlər.
