Misirin Hurqada və Makadi sahillərində köpək balıqlarının görünməsi turistlər arasında ciddi narahatlıq yaradıb.
AzPost xəbər verir ki, ixtioloq və biologiya elmləri namizədi Dmitri Arşavski məsələ ilə bağlı maraqlı açıqlama verib.
Onun sözlərinə görə, köpək balıqları insana məqsədli şəkildə hücum etmir. “Adətən onlar qorxaraq çabalayan insanı yaralı və ya zəif düşmüş dəniz canlısı ilə səhv salırlar. Bu səbəbdən də hücum halları baş verir”, – deyə alim bildirib.
Mütəxəssis qeyd edib ki, köpək balıqları insanı çox vaxt dənizdəki digər canlılarla – xüsusən də suitilər və ya böyük balıqlar ilə qarışdırır. Bu zaman isə hücumdan yayınmaq demək olar ki, mümkünsüz olur. Arşavskiyə görə, suda köpək balığı ilə qarşılaşan insanın özünü sakit aparması həyati əhəmiyyət daşıyır.
Alim əlavə edib ki, Qırmızı dəniz köpək balıqları üçün ən əlverişli mühit hesab olunur. Bunun əsas səbəbi isə yüksək su temperaturu və duzluluq səviyyəsidir. Bu amillər onların çoxalması və aktiv davranışı üçün ideal şərait yaradır.
