Taksi
Bakıda vətəndaş Turan Əhmədov kuryer xidməti ilə bağlı ciddi narazılıq bildirib. Onun sözlərinə görə, “Uber Azerbaijan” platformasında fəaliyyət göstərən Yango kuryeri sifariş üçün ödənişi qəbul etdikdən sonra ünvana qayıtmayıb və müştərini aldadaraq blok edib.
AzPost-a müraciət edən şikayətçi vurğulayır ki, hadisədən sonra kuryer ilə dəfələrlə əlaqə saxlamağa cəhd göstərilsə də, bütün zənglər və mesajlar cavabsız qalıb. Əhmədov hesab edir ki, bu kimi hallarda həm şirkətlərin, həm də dövlət qurumlarının məsuliyyəti mövcuddur.
Hüquqşünaslar bildirirlər ki, belə hallarda müştərinin hüquqları “İstehlakçıların hüquqlarının müdafiəsi haqqında” Qanunla qorunur. Qanunvericiliyə əsasən, istehlakçı aldığı xidmətin keyfiyyətinə, şəffaf ödəniş şərtlərinə və müqavilə öhdəliklərinin yerinə yetirilməsinə dair təminat tələb etmək haqqına malikdir. Əgər ödəniş edilib, amma xidmət göstərilməyibsə, bu artıq istehlakçının aldadılması kimi qiymətləndirilə bilər.
Bundan əlavə, Cinayət Məcəlləsinin dələduzluqla bağlı müddəaları da qüvvəyə minə bilər. Belə ki, ödəniş alınıb xidmət göstərilməməsi, aldatma niyyəti sübuta yetirilərsə, kuryer barəsində cinayət işi açılması mümkündür.
Mütəxəssislər vətəndaşlara belə vəziyyətlərdə şirkətə rəsmi qaydada müraciət etməyi, nəticə əldə olunmazsa, müvafiq dövlət orqanlarına – xüsusilə də Daxili İşlər Nazirliyinə və Antiinhisar və İstehlak Bazarına Nəzarət Dövlət Xidmətinə şikayət ünvanlamağı tövsiyə edirlər.
