Amerikalı sahibkar, “Tesla” və “Space X”in qurucusu İlon Mask (sərvəti 236,9 milyard dollardır) etiraf edib ki, “Tviter”i almaq sövdələşməsi bahalı idi, lakin o, sosial şəbəkənin pərəstişkarı olduğu üçün buna gedib.
Azpost.info xəbər verir ki, Mask bunu Parisdə texnologiya konfransında deyib.
“Əgər çox ağıllıyamsa, onda niyə “Tviter”ə o qədər pul verdim?” – o deyib.
Mask “Tviter”in ondan əvvəl sivilizasiyaya, vətəndaş cəmiyyətinə dağıdıcı təsirinin olduğunu, onun nəzarətinə keçdikdən sonra əsaslı şəkildə “təmizləndiyini” deyib: “Biz botların, fırıldaqçıların və baş verən müxtəlif pis şeylərin 90 faizindən xilas olduq. “Tviter”də uşaq istismarı məzmununun 95 faizindən xilas olduq, bu şok oldu…”.
Mask “Tviter”i 44 milyard dollara almaq üçün müqavilə bağladı və ötən payızda sosial şəbəkəyə rəhbərlik etdi. Bundan sonra o, şirkətdə böyük dəyişikliklərə başladı: işçilərini ixtisar etdi, hesabın bloklanması siyasətinə yenidən baxdı, səhifənin yoxlanılması üçün işarələrin satışına başladı. İşçilərin ixtisar edilməsi planları xəbəri çıxandan sonra onun sərvəti 17 milyard dollar azaldı.
2023-cü ilin may ayında Mask “Tviter”in baş direktoru vəzifəsindən getməyə qərar verdi. O, özünün əvəzinə bu vəzifəyə NBC Universal-ın keçmiş satış rəhbəri Linda Yakkorinonu təyin etdi.
Azpost.info
