Rəhbərlik etdiyi “İrəli, İtaliya” partiyasının deputatları ilə qapalı görüşdə italiyalı siyasətçi Silvio Berluskoni Rusiya prezidenti Vladimir Putinlə münasibətləri bərpa etdiyini bildirib.
Azpost.info xəbər verir ki, bu barədə “LaPresse” agentliyi məlumat yayıb.
Berluskoni əlavə edib ki, sentyabrın 29-da ad günündə Putindən məktub alıb. Məktubda Putin onu beş həqiqi dostundan birincisi adlandırıb.
“Ad günüm üçün mənə 20 şüşə araq və çox isti məktub göndərdi. Mən ona eyni qaydada cavab verdim”, – Berluskoni bildirib.
Maraqlıdır ki, daha sonra “İrəli, İtaliya” partiyası Berluskoninin Putinlə münasibətləri bərpa etməsi ilə bağlı xəbərləri təkzib edib. Xarici işlər naziri postuna iddialı hesab edilən partiya sözçüsü Antonio Tayani bildirib ki, “şüşə hekayəsi” 2008-ci ildə baş verib. Halbuki Berluskoninin müsahibəsində bununla bağlı heç bir işarə yoxdur.
Azpost.info
