Qızıl
ABŞ-ın ən böyük hedcinq fondu olan Bridgewater Associates-in təsisçisi milyarder Rey Dalio investorlara portfellərinin təxminən 15%-ni qızıla ayırmağı tövsiyə edib.
AzPost-un məlumatına görə, bu barədə CNBC xəbər verir.
Dalio bu tövsiyəni ABŞ hökumətində şatdaunda,qızılın qiymətinin bir unsiya üçün 4000 dolları ötdüyü zamanda edib.
Bridgewater Associates təsisçisinə görə qızıl əla portfel diversifikatorudur. “Əgər siz buna sırf strateji aktivlərin bölüşdürülməsi nöqteyi-nəzərindən baxsanız, ehtimal ki, portfelinizin təxminən 15%-i qızılda olmalıdır. Çünki bu, ənənəvi portfel komponentləri qiymətdə azalma zamanı çox yaxşı performans göstərən bir aktivdir”deyə milyarder vurğulayıb.
Dalio qızılın valyutanın ucuzlaşdığı və geosiyasi qeyri-müəyyənlik dövründə hedcinq rolunu oynadığını qeyd edib: “Qızıl, başqasına pul ödəmədən saxlaya biləcəyiniz yeganə aktivdir”.
O, indiki vəziyyəti inflyasiya, yüksək dövlət xərcləri və böyük borcun kağız aktivlərə və fiat valyutalarına inamı sarsıtdığı 1970-ci illərin əvvəlləri ilə müqayisə edib.
CNBC qeyd edir ki, Rey Dalionun tövsiyələri investorlara portfelinin 60%-ni səhmlərdə, qalan 40%-ni isə istiqrazlarda saxlamağı tövsiyə edən maliyyə məsləhətçilərinin tipik məsləhətindən fərqlənir. Bu strategiyanın tərəfdarları aşağı gəlir səbəbindən portfelə yalnız kiçik miqdarda qızıl və digər malların əlavə edilməsini tövsiyə edirlər.
2025-ci ilin əvvəlindən ənənəvi olaraq geosiyasi və iqtisadi risklərə qarşı etibarlı hedcinq hesab edilən qızıl qiymətləri təxminən 50%-ə yaxın artıb.
Bu ilin aprel ayında ABŞ prezidenti Donald Trampın idxala gömrük rüsumları tətbiq etməsi nəticəsində yaranan geosiyasi gərginlik və iqtisadi qeyri-müəyyənlik səbəbindən qiymətlər bir unsiya üçün 3500 dolları ötüb. Sentyabr ayında qızılın qiyməti tarixdə ilk dəfə olaraq 3600 dollar/unsiya, ardınca 3700, 3800 və 3900 dollardan yuxarı qalxmaqla ralli sürətlənib.
Bridgewater Associates-in qurucusu Rey Dalio 19,3 milyard dollar sərvəti ilə Bloomberg Milyarderlər İndeksində 129-cu yerdədir. 2022-ci ilin sentyabrında Dalio Bridgewater Associates hedcinq fondunun rəhbəri vəzifəsindən istefa verib. 2025-ci ilin avqustunda milyarder fonddakı son payını da satıb və direktorlar şurasından istefa verib.
