“Mediatorlar üçün Mediasiya təlimi üzrə tədris vəsaiti” adlı kitab nəşr olunub.
Azərbaycanda mediasiya institutunun inkişaf etdirilməsi, mübahisələrin alternativ həll yollarının təşviqi və mediatorların peşəkar hazırlıq səviyyəsinin yüksəldilməsi istiqamətində növbəti mühüm təşəbbüs reallaşdırılır. Bu məqsədlə “Mediatorlar üçün Mediasiya təlimi üzrə tədris vəsaiti” adlı müasir və praktik yönümlü kitab hazırlanaraq nəşrə təqdim edilib.
Layihə Avrasiya Hüquqşünaslar Assosiasiyası İctimai Birliyi tərəfindən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir. Layihənin strateji tərəfdaşları sırasında Mediasiya Şurası, Azərbaycan Respublikasının Ədliyyə Nazirliyinin Ədliyyə Akademiyası və müxtəlif mediasiya təşkilatları yer alır.
Hazırlanmış tədris vəsaiti Azərbaycan mediasiya sistemində ilk dəfə olaraq vahid, sistemli və elmi-praktik yanaşma əsasında formalaşdırılıb. Kitab mediatorların ilkin hazırlıq, təkmilləşdirmə və davamlı təlim proseslərində geniş şəkildə istifadə olunacaq. Eyni zamanda, vəsait hüquqşünaslar, tədqiqatçılar və mediasiya sahəsinə maraq göstərən digər mütəxəssislər üçün də faydalı mənbə olacaqdır.
Kitabda mediasiya prosesinin hüquqi və institusional əsasları, mediator davranış kodeksi, danışıqların psixologiyası, konfliktlərin idarə olunması metodları və barışıq sazişlərinin effektiv tərtibi kimi vacib mövzular ətraflı şəkildə əhatə olunub. Eyni zamanda real nümunələr, təlim metodikası və praktiki tapşırıqlar da təqdim olunaraq istifadəçilərin praktiki biliklərini artırmaq hədəflənib.
Kitabın təqdimat mərasimləri Bakı Dövlət Universitetində və Ədliyyə Nazirliyinin Ədliyyə Akademiyasında keçiriləcək. Nəşr olunmuş vəsait bütün mediatorlara ödənişsiz şəkildə təqdim olunacaq, bu isə layihənin sosial faydalılığını və inklüzivliyini daha da artırır.
Bu təşəbbüs, dövlət və vətəndaş cəmiyyəti institutları arasında uğurlu əməkdaşlığın bariz nümunəsidir və mediasiya sahəsində insan kapitalının inkişaf etdirilməsinə yönəlmiş strateji addımdır.
