Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Öyrədərək Öyrənirik” Gənclərin İntellektual İnkişafına Dəstək İctimai Birliyinin təşkilatçılığı ilə icra olunan “Mind Odyssey” regional intellektual turnir layihəsi çərçivəsində keçirilən intellektual yarışa yekun vurulub.
22-27 sentyabr 2025-ci il tarixlərində turnirin “A”, “B”, “C”, “D” və “E” qruplarının oyunları, həmçinin yarımfinal və final mərhələsi keçirilib.
İlk olaraq, 22 sentyabr tarixində bilik yarışının qrup mərhələsinə start verilib və ilk yarış günü gənclərin maraqlı mübarizəsi ilə yadda qalıb. Qazax Gənclər Evində təşkil olunan turnirin “A” qrupunda 4 komanda – Ağstafa şəhər Ə.Hüseynov adına 1 saylı tam orta məktəbin “Hədəf”, Qazax rayon Hüseynbəyli kənd A.Əliyev adına tam orta məktəbin “Nobelium”, Ağstafa rayon Dağkəsəmən kənd 1 saylı tam orta məktəbin “Qarabağ” və Ağstafa rayon Poylu kənd S.Məmmədov adına tam orta məktəbin “Lider” komandaları mübarizə aparıb. Səsləndirilən 15 suala ən çox doğru cavab tapan “Lider” və “Hədəf” komandaları yarımfinala vəsiqə qazanan ilk komandalar olublar.
23 sentyabrda isə turnirin “B” qrupunun oyunları təşkil olunub. Bu dəfə Qazax şəhər S.Vurğun adına 2 saylı tam orta məktəbin “Vurğun”, Ağstafa şəhər A.Abdullayev adına 2 saylı tam orta məktəbin “Zirvə”, Qazax rayon Kosalar kənd İ.Şıxlı adına tam orta məktəbin “Viktoriya”, Ağstafa rayon Dağkəsəmən kənd İ.Salıfov adına 2 saylı tam orta məktəbin “Xarı Bülbül” və Ağstafa rayon Vurğun qəsəbə H.Əzizov adına tam orta məktəbin “İkonlar” komandaları qarşılaşıblar. Gərgin mübarizə şəraitində keçən yarışın nəticələrinə əsasən, “Zirvə” və “Vurğun” komandaları adlarını yarımfinala yazdırmağa nail olublar.
“C” qrupunun oyunları 24 sentyabr tarixində keçirilib. Qrupda Qazax şəhər İ.Qayıbov adına 3 saylı tam orta məktəbin “Kosmos”, Qazax rayon Daş Salahlı kənd A.Əmilov adına 1 saylı tam orta məktəbin “Qara İnci”, Qazax rayon Çaylı kənd V.Göşşüyev adına 1 saylı tam orta məktəbin “Terrible Space”, Qazax rayon Orta Salahlı kənd S.M.Hacıyev adına tam orta məktəbin “Zəka” və Ağstafa rayon Qıraq Kəsəmən kənd X.Mirzəyev adına tam orta məktəbin “Turan” komandaları mübarizə aparıb. Qaydaya əsasən, səsləndirilən 15 suala ən çox doğru cavab tapan “Kosmos” və “Terrible Space” komandaları yarımfinala adlayıblar.
Turnir 25 sentyabr tarixində “D” qrupunun oyunları ilə davam edib. Bu dəfə Qazax şəhər F.Şamoyev adına 4 saylı tam orta məktəbin “Şuşa”, Qazax rayon Daş Salahlı kənd Ş.Cəbiyev adına 2 saylı tam orta məktəbin “Sabah”, Qazax rayon Çaylı kənd E.Cəfərov adına 2 saylı tam orta məktəbin “Nirvana”, Qazax rayon Yuxarı Salahlı kənd Z.Mahmudov adına tam orta məktəbin “Ayın kölgəsi” və Ağstafa rayon Həsənsu kənd A.Mustafayev adına tam orta məktəbin “Viktoriya” komandaları mübarizə aparıb. Ənənəyə uyğun olaraq, səsləndirilən 15 suala ən çox doğru cavab tapan “Nirvana” və “Viktoriya” komandaları yarımfinala adlayıblar.
Nəhayət, 26 sentyabr tarixində sonuncu – “E” qrupunun oyunu təşkil olunub. Sonuncu turda Qazax şəhər M.Hüseyn adına texniki-humanitar təmayüllü məktəb-liseyin “Difai qılıncları”, Ağstafa şəhəri texniki-humanitar təmayüllü liseyin “Ulduz” və Qazax rayon Ağköynək kənd Ş.Çobanov adına tam orta məktəbin “Phoenix” komandaları üz-üzə gəlib. Qazax şəhər N.Vəliyev adına 5 saylı tam orta məktəb və Qazax rayon Xanlıqlar kənd Ş.Şahvələdov adına tam orta məktəbin komandaları yarışda iştirak etməyiblər Beləliklə, yarımfinala vəsiqə qazanan son iki komandanın adlarına aydınlıq gətirilib: bunlar “Ulduz” və “Difai qılıncları” komandaları olub.
Qrup mərhələrində ən yaxşı nəticə göstərmiş on komanda 27 sentyabr tarixində yarımfinalda mübarizə aparıblar, Səsləndirilən 15 suala ən çox doğru cavab verən “Nirvana”, “Vurğun”, “Kosmos” və “Viktoriya” komandaları finalda oynamaq hüququ qazanıblar.
Eyni gündə təşkil olunan final görüşündə isə Ağstafa məktəbliləri hamıdan güclü olublar. Belə ki, Ağstafa rayon Həsənsu kənd A.Mustafayev adına tam orta məktəbin “Viktoriya” komandası bütün rəqiblərini qabaqlayaraq, turnirin kubokunu başı üzərinə qaldırıb. Qazax şəhər İ.Qayıbov adına 3 saylı tam orta məktəbin “Kosmos” və Qazax rayon Çaylı kənd E.Cəfərov adına 2 saylı tam orta məktəbin “Nirvana” komandaları müvafiq olaraq II və III yerləri tutublar. Hər üç komandanın üzvləri müvafiq diplomlarla təltif olunub..
Qeyd edək ki, “Mind Odyssey” regional intellektual turnir layihəsi 1 sentyabr tarixində start götürüb və 31 oktyabr tarixində yekunlaşacaqdır.
