Rusiyada Ukraynaya qarşı müharibə başlayandan bəri dövlət orqanları ilə əlaqəli obyektlərə ən azı 164 hücum olub.
Azpost.info xəbər verir ki, bunu “Avtozak LIVE” layihəsi hesablayıb.
Ən çox hərbi qeydiyyat və komissarlıqlara hücum edilib. İyunun 28-nə olan məlumata görə, 90 belə hal müəyyən edilib. Binaların əksəriyyəti molotof kokteyli ilə yandırılıb. İki hücum pnevmatik silahlardan atəşlə müşayiət olunub.
Ən çox hücumlar Moskva vilayətində (12), Leninqrad vilayətində (9), Moskvada (8) və Sankt-Peterburqda (8) qeydə alınıb. Bundan sonra Krasnodar diyarı (6), Sverdlovsk və İrkutsk vilayətləri (hər biri 5), həmçinin Primorye (5) gəlir.
Hərbi komissarlıqların və digər dövlət qurumlarının yandırılması rusların Ukraynadakı müharibəyə etirazının ifadəsidir. Əvvəlcə belə hallarda qəsdən yandırma ilə bağlı cinayət işləri açılırdı. Bunun üçün maksimum cəza 5 il həbsdir. Lakin prezident Vladimir Putinin səfərbərlik elan etməsindən sonra bu halları terror aktları kimi qiymətləndirilməyə başlayıblar. Bu maddə 10 ildən ömürlük həbs cəzasını nəzərdə tutur.
Azpost.info
