NATO Baş katibi Yens Stoltenberq bu vəzifədə daha bir il qalacaq.
Azpost.info xəbər verir ki, bu barədə “Politico” mənbələrə istinadən yazıb.
Adı açıqlanmayan ABŞ rəsmisi bildirib ki, Stoltenberqin baş katiblik müddətinin uzadılması artıq müəyyən edilmiş məsələdir.
Qərbi Avropanın yüksək rütbəli diplomatı məlumatı təsdiqləyib və bildirib ki, qərar gələn həftə rəsmiləşdiriləcək.
Şərqi Avropadan olan yüksək rütbəli diplomat və NATO rəsmisi də təsdiqləyiblər ki, Stoltenberqin səlahiyyət müddətini uzatmaq üçün Alyans daxilində konsensus var.
Nəşrin yazdığına görə, NATO-ya üzv ölkələr Şimali Atlantika Alyansının iyulun 11-12-də Vilnüsdə keçiriləcək böyük sammitindən əvvəl baş katib postunu kimin tutacağına dair qərar qəbul etmək istəyiblər. Müttəfiqlər bu qərarı qəbul etmək üçün bir neçə ay sərf ediblər. Mümkün varislər kimi Danimarkanın Baş naziri Mette Frederiksen və Böyük Britaniyanın müdafiə naziri Ben Uolles hesab edilib.
“Politico” yazır ki, Stoltenberqin baş katiblik müddətinin uzadılması qərarna Rusiyanın Ukraynaya müdaxiləsi təsir edib. Bir sıra ölkələr NATO üçün siyasi baxımdan çətin bir zamanda ehtiyatlı ritorikası ilə tanınan Stoltenberqi dəstəkləməyə üstünlük veriblər.
Azpost.info
