NATO-nun Vilnüs sammiti (11-12 iyul) ərəfəsində Qərb ölkələrindən ibarət qrup Ukraynanın təhlükəsizlik zəmanətləri ilə bağlı danışıqlar aparır.
Azpost.info xəbər verir ki, bu barədə “Politico” mənbələrə istinadən yazır.
Xüsusilə, ABŞ, Britaniya, Fransa və Almaniya Ukraynaya daimi hərbi yardım göstərməyə hazır olan bütün ölkələr üçün “çətir” yaratmağı təklif edirlər.
Ölkələr öz planlarını NATO sammitində təqdim etməyə hazırlaşır və yekun detallar ABŞ prezidenti Co Bayden iyulun 10-da Londonda olarkən razılaşdırılacaq.
“Bunlar əsasən Ukrayna silahlı qüvvələrini çox uzun müddət təchiz edəcəyimizə, maliyyələşdirəcəyimizə, onlara məsləhətlər verəcəyimizə və təlim keçəcəyimizə zəmanətdir ki, gələcəkdə hər hansı təcavüzün qarşısını almaq üçün gücə malik olsunlar”, – mənbələrdən biri deyib.
Öz növbəsində, Ukrayna NATO-nun Vilnüsdə keçiriləcək sammiti zamanı Alyansa qoşulmaq üçün dəvət almazsa, öz strategiyasına yenidən baxacağına söz verib. Bunu Ukrayna Baş nazirinin Avropa və Avro-Atlantika inteqrasiyası üzrə müavini Olqa Stefanişina bildirib. Onun sözlərinə görə, bu halda Kiyevin əsas məqsədi Qərb ölkələrindən təhlükəsizlik zəmanəti almaq olacaq.
Azpost.info
