Neftçala rayonunda aqrar sahədə keçirilən növbəti maarifləndirici təlim üzüm bağlarının becərilməsi zamanı qarşıya çıxan problemlərin aradan qaldırılmasına həsr olunub.
Bu barədə məlumatı Neftçalada Qadınların Sosial İnkişafına Dəstək İctimai Birliyi təqdim edib. Aqrar fəaliyyətdən yüksək məhsuldarlıq və gəlir əldə etmək üçün becərmə qaydalarına düzgün əməl olunması mühüm əhəmiyyət daşıyır. Bu məqsədlə təşkil edilən növbəti təlimin mövzusu üzümçülük sahəsinə aid olub.
Kənd Təsərrüfatı Nazirliyi yanında Aqrar Xidmətlər Agentliyinin Aqrar Təlim Mərkəzinin Salyan Regional Təlim Mərkəzi tərəfindən Qaraman İcma Mərkəzinin təşkilatçılığı ilə icma üzvünə məxsus fərdi üzüm bağında “Üzüm sahələrində yaşıl budama işlərinin aparılması, onun əhəmiyyəti, xəstəlik və zərərvericilərə qarşı inteqrir mübarizə tədbirləri” mövzusunda praktiki təlim keçirilib.
Təlim zamanı üzüm bağlarında müşahidə olunan becərmə nöqsanları fermerlərin diqqətinə çatdırılıb, yaşıl budamanın düzgün aparılması qaydaları izah edilib, həmçinin xəstəlik və zərərvericilərlə mübarizə üsulları barədə ətraflı məlumat verilib. İştirakçıların sualları cavablandırılıb, məhsuldarlığın artırılması və keyfiyyətli məhsul əldə olunması üçün tövsiyələr təqdim edilib.
Fotolar
