Norveçdəki Nobel İnstitutu 2025-ci il Nobel Sülh Mükafatı laureatının adının sızması ilə bağlı xəbərlərdən sonra araşdırmaya başlayıb.
AzPost Financial Times-a istinadən bildirir ki, vəziyyətin yaranmasına səbəb Venesuelanın müxalif siyasətçisi Maria Korina Maçadonun nəticələrin rəsmi elan edilməsinə bir neçə saat qalmış qələbəsi ilə bağlı onlayn mərclərin artması olub.
Nəşrin məlumatına görə, Polymarket proqnoz bazarında Maçadonun qələbəsi ilə bağlı əmsallar mərasimdən bir gün əvvəl 3,7% təşkil edirdisə, elandan bir neçə dəqiqə əvvəl 31,5%-ə yüksəlib. O vaxta qədər nə media, nə də analitiklər onu mükafatın əsas namizədi hesab etmirdilər.
Nobel İnstitutu Norveç mətbuatına komitənin qərarı ilə bağlı məlumatların sızmasının mənbəyini müəyyən etmək üçün araşdırmaya başladığını təsdiqləyib.
2025-ci il Nobel Sülh Mükafatına 244 fiziki şəxs və 94 təşkilat daxil olmaqla 338 namizəd irəli sürülüb. Namizədlər arasında ABŞ prezidenti Donald Tramp, isveçli iqlim fəalı Qreta Tunberq, Ümumdünya Səhiyyə Təşkilatı və BMT-nin baş katibi Antonio Quterreş var.
Mükafatların təqdimetmə mərasimi dekabrın 10-da Osloda, Alfred Nobelin xatirə günündə keçiriləcək. Bu il hər kateqoriya üzrə mükafat fondu 11 milyon İsveç kronu (təxminən 1,17 milyon dollar) təşkil edir.
Nobel Həftəsi oktyabrın 6-da başlayıb. Artıq tibb, fizika, kimya və ədəbiyyat üzrə laureatlar bəlli olub.
