Novosibirsk vilayətində Rusiya Qvardiyasının rəhbərliyi altında Kollektiv Təhlükəsizlik Müqaviləsi Təşkilatının (KTMT) “Kobalt-2024” xüsusi təliminin açılış mərasimi keçirilib.
Azpost.info xəbər verir ki, bu barədə Qornı təlim mərkəzindən məlumat verilib.
Avqustun 16-da başa çatacaq təlimlər çərçivəsində iştirakçılar təcrübə mübadiləsi aparacaq və xüsusi təyinatlı bölmələr arasında qarşılıqlı fəaliyyət bacarıqlarını inkişaf etdirəcəklər. KTMT-nin çevik reaksiya qüvvələrinin tərkibinə daxil olan bölmələr qeyri-qanuni silahlı birləşmələrin axtarışı, aşkarlanması və məhv edilməsi üzrə birgə hərəkətlərdə praktiki bacarıqlar əldə edəcəklər. Son gün xüsusi təyinatlılar binalara və nəqliyyat vasitələrinə hücum etmək, girovları azad etmək və yaraqlıları zərərsizləşdirmək üçün təyyarə və dronlardan istifadə edəcək.
Təlimdə Rusiya, Belarus, Qazaxıstan, Tacikistan və Qırğızıstanın nazirlik və idarələrinin nümayəndələri iştirak edir. Ermənistan təlimlərə qatılmayıb.
Azpost.info
