“Rusiya Dumasının Çeçenistandan olan deputatları və senatorları Ramzan Kadırovun “Quran”ı yandıran Nikita Juraveli istintaq təcridxanasında döyən 15 yaşlı oğlu Adamı dəstəkləyirlər”.
Azpost.info xəbər verir ki, bunu Kadırovun yaxın dostu və müttəfiqi, Dumanın deputatı Adam Delimxanov bildirib.
“Bu qeyri-insan Juravelin iyrənc cinayətini nəzərə alaraq, Adam çox humanist davranaraq onu sağ buraxdı. Bu cür əməllərə görə insanlar ən ağır cəzaya layiqdirlər”, – Delimxanov “Teleqram” kanalında yazıb.
Onun fikrincə, Kadırovun oğlu vətənpərvərlik nümunəsi göstərib. Delimxanov bu fikirlə razılaşmayanları 15 yaşlı yeniyetmənin əməlini şəxsən onunla müzakirə etməyə çağırıb.
Çeçenistan parlamentinin rəhbəri Maqomed Daudov da oxşar bəyanatla çıxış edib.
“Mən tam əminəm ki, Adam əsl müsəlman, əsl vətənpərvər və əsl çeçen kimi davrandı! Dinindən və milli mənsubiyyətindən asılı olmayaraq hər bir ağlı başında olan insan onun bu küfrlə bağlı hərəkətinə də tam haqq qazandıracaq”, – Daudov deyib.
Azpost.info