Latın dilindən tərcümədə “artrit” sözü “oynaq ağrısı” mənasını verir. Bu xəstəlik oynaqlarda ağrı və iltihabla müşayiət olunur. Mütəxəssislər bildirirlər ki, artritin qarşısının alınmasında düzgün qidalanma mühüm rol oynayır. Lakin pəhriz hesab edilən bütün məhsullar oynaqlar üçün faydalı deyil.
Azpost.info bildirir ki, araşdırmalara görə, oynaq iltihabından əziyyət çəkən insanlar üçün əsas risklərdən biri omeqa-6 yağ turşularının həddindən artıq qəbulu hesab olunur.
Mütəxəssislər qeyd edirlər ki, omeqa-6 yağ turşuları orqanizmin böyüməsi və inkişafı, həmçinin ürək sağlamlığı üçün vacib olsa da, onların normadan artıq qəbulu iltihab proseslərini gücləndirən maddələrin yaranmasına səbəb ola bilər.
Bu yağ turşuları əsasən qarğıdalı, soya, yerfındığı və küncüt yağlarında olur. Bu yağlardan uzun müddət və həddindən artıq istifadə artrit əlamətlərinin kəskinləşməsinə səbəb ola bilər.
Həkimlər iltihabla mübarizə üçün omeqa-3 yağ turşuları ilə zəngin məhsullara üstünlük verməyi tövsiyə edirlər. Bu maddələr qızılbalıq, skumbriya kimi yağlı balıqlarda, həmçinin qoz, kətan və çia toxumlarında bol miqdarda mövcuddur.
Mütəxəssislərin sözlərinə görə, omeqa-3 yağ turşuları orqanizmdə iltihabın azalmasına kömək edir və oynaqların sağlamlığını dəstəkləyir.
Artritin profilaktikası üçün tövsiyə olunan qidalanma modeli əsasən Aralıq dənizi pəhrizinə uyğundur. Bu pəhrizə müxtəlif meyvə və tərəvəzlər, tam taxıl məhsulları, paxlalılar, qoz-fındıq, zeytun yağı və balıq daxildir.
Həkimlər bildirirlər ki, antioksidantlar və faydalı doymamış yağlarla zəngin olan Aralıq dənizi pəhrizi orqanizmdə iltihabın səviyyəsini azaltmağa kömək edir, oynaqların fəaliyyətini yaxşılaşdırır və artrit riskini aşağı sala bilər.
Sunay Aydın
