Gürcüstanın keçmiş prezidenti Mixail Saakaşvilinin hazırda qaldığı “Vivamed” özəl klinikasının klinik direktoru Zurab Çxaidze siyasətçini həkimlərin təyin etdiyi müalicə kursuna qayıtmağa çağırıb.
Azpost.info xəbər verir ki, direktor bildirib ki, Saakaşvili bunu səhhətini ağırlaşdıracaq ölümcül nəticələrin qarşısını almaq üçün etməlidir.
“Mən ailə üzvlərinə, anasına çağırış etmək istəyirəm ki, hansısa yolla bu insanı müalicəyə, həkimlərin tövsiyələrinə tabe olmağa inandırsınlar. Əks halda, bu vəziyyət bizi ölümcül nəticəyə apara bilər”, – Çxaidze bu gün jurnalistlərə açıqlamasında deyib.
Həkim əlavə edib ki, son vaxtlar Saakaşvili qida qəbulunu xeyli azaldıb: “Biz həmişə demişik ki, o, tövsiyə olunan miqdarda deyil, yanlış kalorili qida qəbul edir. Son günlər, xüsusən də dünəndən etibarən o, ümumiyyətlə, qida qəbulunu azaldıb. Qida əlavələri qəbul etməkdən də imtina edib”.
Çxaidzenin sözlərinə görə, Saakaşvili bir neçə gün əvvəl koronavirusa yoluxsa da, bu, onun normal qidalanmasına mane olmur.
Azpost.info
