Braziliya futbolunun əfsanəsi Peleyə məxsus, 1958-ci il dünya çempionatının finalında geyindiyi forma hərracda 4,9 milyon dollara satılıb.
Azpost.info xəbər verir ki, bu barədə Sotheby’s hərrac evi məlumat yayıb.
Məlumata görə, bu forma futbol kralı kimi tanınan Pelenin adı ilə bağlı indiyədək hərracda satılan ən bahalı idman xatirə əşyası olub.
Söhbət 17 yaşlı Pelenin 1958-ci il dünya çempionatının finalında geyindiyi 10 nömrəli mavi formadan gedir. Həmin oyunda Braziliya ev sahibi İsveçi Stokholmda 5:2 hesabı ilə məğlub edərək tarixində ilk dünya çempionluğunu qazanmışdı. Pele isə final görüşündə iki qol vuraraq komandasının qələbəsində əsas rol oynamışdı.
Hərrac zamanı forma uğrunda beş alıcı arasında gərgin rəqabət yaşanıb və ümumilikdə 10 təklif verilib.
Bu satış Pelenin formasını hərrac tarixində ikinci ən bahalı futbol forması edib.
Bu kateqoriyada rekord isə Argentina millisinin əfsanəsi Dieqo Maradonaya məxsusdur. Onun 1986-cı il dünya çempionatında İngiltərəyə qarşı oyunda, məşhur “Tanrının əli” qolunu vurduğu matçda geyindiyi forma 2022-ci ildə 9,3 milyon dollara satılıb.
Pele 2022-ci ildə 82 yaşında vəfat edib. O, 1958-ci il dünya çempionatının finalında iki qol vuraraq indiyədək dünya çempionatlarının finallarında qol vuran ən gənc futbolçu olaraq qalır.
Sotheby’s bildirir ki, bu forma ilk dəfə hərraca çıxarılmır. O, 2004-cü ildə keçirilən hərracda 70 505 funt sterlinqə (o dövrün məzənnəsi ilə təxminən 105,6 min ABŞ dollarına) satılmışdı.
Sunay Aydın
