Pomidoru 1 dollara satırıq ketçupu 3 dollara alırıq
“Pomidoru 1 dollara satırıq, ketçupu 3 dollara alırıq” – Ekspert
“Biz 1 kq pomidoru xaricə 1,2 dollara satırıq, pomidordan istehsal olunan ketçupu isə xaricdən tordan satış qiyməti ilə 3 dollara alırıq”.
AzPost bildirir ki, bu sözləri REAL Partiyasnın sədri Natiq Cəfərli ölkəyə Omandan ketçup idxalı ilə bağlı yayıan xəbəri şərh edərkən bildirib.
Onun sözlərinə görə, Azərbaycanın xaricə satdığı aqrar sektor məhsullarında ilk yeri pomidor tutur.
2024-cü ildə ixrac etdiyimiz pomidorun hər kilosu ortalama 1,2 dollar, və ya 2 manat olub.
“1 kq pomidordan 600-700 qram ketçup alınır. Azərbaycanda Rusiya və Türkiyə istehsalı ketçupun 200 qramı, ortalama 2,5 manatdır. Yəni, 1 kq pomidordan alınan ketçup 7,5 manata satılır. Bu da 4 dollar 40 sent edir. Beləliklə, biz 1 kq pomidoru xaricə 1,2 dollara satıb, xaricdən pomidordan istehsal etdiyi ketçupu tordan satış qiyməti ilə ən azı 3 dollara alırıq” -deyə N.Cəfərli bildirib
Onun sözlərinə görə, bizim marketlərdə Rusiya istehsalı çox sayda ketçup var. Biz də ixrac etdiyimiz pomidorun 85%-ə yaxınını Rusiyaya satırıq: “Rusiya istehsalçısı bizdən 1,2 dollara aldığı pomidordan sonra ketçup istehsal edib elə bizə bunu topdan 3 dollara satır. Rusiya həm də öz ərazisində istehsal qurduğuna görə əlavə iş yerləri yaradır, ən əsası, əlavə dəyər yaradır. Sonra da məmləkətdə iş tapmayan azərbaycanlı Rusiyaya gedib elə həmin ketçup zavodunda iş tapır.
Bax belə bir iqtisadi vəziyyətdə yaşayırıq, sonra da hətta Omandan ketçup idxal edirik…”-deyə REAL sədri narazılığını qeyd edib.
