Rusiyalı milyarder Mixail Fridman Londonun mərkəzində bahalı italyan restoranında görünüb.
Azpost.info xəbər verir ki, bu barədə “Daily Mail” məlumat yayıb.
Sanksiyalara məruz qalan və restoranlara getmək üçün pulunun olmamasından şikayətlənən rusiyalı iş adamı nüfuzlu “Mayfair” bölgəsindəki restoranda nahar edib. “Fridman ən yaxşı italyan restoranlarından olan “C London”da görünüb. Burada iki nəfərlik şam yeməyinin qiyməti yüzlərlə funt-sterlinqdir. David və Viktoriya Bekhem, həmçinin “Formula 1”in keçmiş baş direktoru Berni Ekklstoun buranın daimi müştəriləridir”, – məlumatda deyilir.
Restorana gələnlərdən biri (Britaniyada şirkət direktoru-red:) “Daily Mail”ə bildirib ki, rusiyalı iş adamının yanında təxminən 30 yaşlarında ukraynalı xanım olub: “Məncə, sanksiya altında ayda 2500 funt-sterlinq xərcələyə bildiyi üçün naharın pulunu birlikdə olduğu xanım ödəyib”.
“Sunday Times”ın məlumatına görə, 2021-ci ildə sərvəti 10,8 milyard funt-sterlinq qiymətləndirilən Mixail Fridman Britaniyanın ən zəngin adamları siyahısında 11-ci yerdə idi. Fevralın 28-də Avropa İttifaqı Fridman və onun biznes ortağı Pyotr Avenə qarşı sanksiyalar tətbiq edib. Britaniya da oxşar addım atdığı üçün onun ölkədə fəaliyyət göstərən son bank kartı da dondurulub.
İspaniyanın “El Pais” qəzetinə müsahibəsində Fridman maddi çətinliklərdən danışaraq, restoranlara getmək üçün pulunun olmamasından şikayətlənmişdi. “Bloomberg”ə verdiyi başqa bir müsahibədə isə o, pul xərcləmək üçün Britaniyanın səlahiyyətli orqanlarına müraciət etməli olduğunu etiraf etmişdi. “Bu sorğular xərc məqbul hesab olunarsa, təmin edilir”, – milyarder bildirmişdi.
Azpost.info
