Rusiya prezidenti Vladimir Putin oktyabrın 17-18-də “Bir kəmər – bir yol” üçüncü Beynəlxalq Forumunun tədbirlərində iştirak etmək üçün Çinə səfər edəcək.
Bu barədə Putinin beynəlxalq məsələlər üzrə köməkçisi Yuri Uşakov bildirib.
Onun sözlərinə görə, səfər zamanı Çin lideri Si Cinpinlə danışıqlar, həmçinin forumun iştirakçısı olan dövlətlərin liderləri ilə bir sıra ikitərəfli görüşlər nəzərdə tutulub: “Putin Pekində Vyetnam, Laos, Monqolustan prezidentləri, Tailandın baş naziri ilə görüşlər keçirəcək və digər təmaslar üzərində iş aparılır”.
Yuri Uşakov bildirib ki, Rusiya Federasiyası və Çinin dövlət başçıları arasında gözlənilən təmas zamanı bir neçə maraqlı və mənalı müqavilə və sazişlər imzalanacaq.
“Putin və Si Cinpin oktyabrın 18-də keçiriləcək danışıqlarda ikitərəfli və beynəlxalq mövzuları, o cümlədən ədalətli çoxqütblü dünyanın formalaşmasını müzakirə edəcəklər. Rusiya Federasiyası ilə Çin arasında münasibətlər görünməmiş yüksək səviyyədədir və xarici təzyiqlərə qarşı müqavimət nümayiş etdirir.
Rusiya Çinin Ukrayna böhranı ilə bağlı mövqeyini yüksək qiymətləndirir, Pekin vəziyyəti yaxşı başa düşür və onun həllinə səmimiyyətlə çalışır”, deyə Kreml rəsmisi vurğulayıb.
Uşakov Putinin Pekinə səfər zamanı başçılıq edəcəyi nümayəndə heyətinə baş nazirin müavinləri Novak, Çernışenko, nazirlər Lavrov, Reşetnikov, Savelyev, Siluanov, Çekunkov və Mərkəzi Bankın rəhbəri Nabiulinanın daxil olduğunu söyləyib.
