Rusiya prezidenti Vladimir Putin səfərbərlik çərçivəsində hərbi xidmətə çağırışdan möhlət verilməsi haqqında sərəncama dəyişiklik edib.
Azpost.info xəbər verir ki, bu barədə Kremlin saytında yayılan məlumatda bildirilir.
Putin bildirib ki, Müdafiə Nazirliyinin səfərbərliyə cəlb olunmayanların siyahısı ilə bağlı qanunvericilik bazasına dəyişiklik etməyə vaxtı yoxdur və buna görə də ayrıca sərəncam verməli olub.
Yeni sərəncama əsasən, aspirantlar səfərbərlikdən möhlət ala biləcəklər. Bundan başqa, axşam şöbəsində təhsil alan tələbələr də səfərbərlik çərçivəsində hərbi xidmətə çağırışdan azad olunacaqlar.
Bundan əvvəl Rusiya Silahlı Qüvvələrinin Baş Qərargahı ölkənin hərbi komissarlıqları üçün hazırlanmış qismən səfərbərlikdən möhlət hüququ olanların siyahısını dərc etmişdi. Bura hərbi-sənaye kompleksinə daxil olan təşkilatlarda, informasiya texnologiyaları sahəsində akkreditə olunmuş şirkətlərdə, habelə ayrı-ayrı rabitə vasitələrinin fəaliyyətinin dayanıqlığını təmin edən müəssisələrdə çalışan vətəndaşlar daxil idi.
Bundan başqa, siyahıya informasiya və kommunikasiya sahəsində fəaliyyət göstərən əsas qurumların, eləcə də KİV-lərin əməkdaşları, milli ödəniş sisteminin, ölkənin maliyyə bazarı infrastrukturunun sabitliyini təmin edən və bank likvidliyini idarə edənlər də daxil edilmişdi.
Azpost.info
