Türkiyə prezidenti Rəcəb Tayyib Ərdoğan rusiyalı həmkarı Vladimir Putinlə Səmərqənd görüşündə ona növbəti dəfə Ukrayna lideri Vladimir Zelenski ilə görüş təklif edəcək.
Azpost.info xəbər verir ki, Türkiyə və Rusiya liderlərinin görüşündə gündəmin digər məsələsi “taxıl dəhlizi”nin fəaliyyəti olacaq.
“Ərdoğanla Putinin görüşündə ən mühüm mövzu Ukraynadakı vəziyyət olacaq. Putinə liderlərin Türkiyədə görüş təklifini təkrarlayacaq prezident Ərdoğan diqqətini məsələnin diplomatik həllinə yönəldəcək”, – “Huriyyet” yazır.
Putin Şərq İqtisadi Forumundakı çıxışında Ukraynadan taxıl ixracı ilə bağlı vəziyyəti növbəti aldatma adlandırmışdı. Rusiya lideri qeyd etmişdi ki, Ukraynadan ixrac edilən taxılın demək olar ki, hamısı Aİ ölkələrinə gedib. Onun sözlərinə görə, 87 gəmidən yalnız ikisi kasıb ölkələrin payına düşüb.
Qeyd edək ki, prezidentlər Şanxay Əməkdaşlıq Təşkilatının sammiti çərçivəsində görüşəcəklər. Sammit sentyabrın 15-16-da Səmərqənddə keçiriləcək.
Azpost.info
