“Beynəlxalq Əlillər Cəmiyyəti” İB (BƏCİB) Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Qayıdışa aparan yol” layihəsini icra edir.
Layihə çərçivəsində nəzərdə tutulan eyni adlı maarifləndirici televiziya verilişi “Dünya” TV-də yayımlanmışdır. Verilişdə layihə rəhbəri və BƏCİB sədri Tahir Xudiyev ilə yanaşı İdarə Heyətinin üzvləri — şəhid polkovnik-leytenant Rəşad Quliyevin anası Mətanət Quliyeva, BDU-nun professoru, əməkdar jurnalist Allahverdi Məmmədli və “Xankəndi” Məcburi Köçkünlərə Kömək İB-in sədri Xatirə Vəliyeva iştirak etmişlər.
Tahir Xudiyev qeyd etmişdir ki, “Qayıdışa aparan yol” azadlığa və sülhə gedən yolun həm qəhrəmanlıq, həm də mənəvi güc üzərində qurulduğunu göstərir. Onun sözlərinə görə, Qarabağa qayıdış Azərbaycan tarixində yeni mərhələnin başlanğıcıdır.
Çıxış edənlər layihənin keçmiş məcburi köçkünlərin, müharibə əlillərinin, müxtəlif kateqoriyalı əlilliyi olan şəxslərin və şəhid ailələrinin sosial həyata inteqrasiyasına, eləcə də yaşayış səviyyəsinin yaxşılaşdırılmasına töhfə verəcəyini bildirmişlər.
Layihə çərçivəsində növbəti tədbirin Bakı şəhəri Qaradağ rayonunun “Qobu Park-2” yaşayış kompleksində keçirilməsi planlaşdırılır.
Fotolar
