Kalininqradda baş verən dəhşətli hadisə ictimaiyyəti silkələyib.
AzPost xəbər verir ki, “Pobeda” bağ sahələrində 70 yaşlı kişi qonşusundan qisas almaq məqsədilə onun evini yandırıb. Nəticədə 4 yaşlı uşaq həlak olub.
Məlumata görə, təqaüdçü kişi əvvəllər qonşusunun sahəsində işləyib, lakin qonşusu ona pulunu tam verməyib. Bundan sonra o, əlində benzin kanistrası ilə geri qayıdaraq evin kandarını və qapısını maye ilə isladıb, üstünə odun yığıb və alovlandırıb.
İstintaq məlumatına görə, təqsirkar qadını öldürmək niyyətində olub, lakin gözlənilmədən onun 4 yaşlı nəvəsi evdə yanaraq həyatını itirib. Qadın isə möcüzə nəticəsində evdən çıxmağa nail olub.
Şahidlərin sözlərinə görə, kişi qəsdən alovun böyüməsini gözləyib ki, evdən çıxmaq mümkün olmasın.
Hazırda hadisə ilə bağlı cinayət işi açılıb. Prokurorluq işin məhkəməyə göndəriləcəyini açıqlayıb. Təqsirkar isə həbs edilib.
