Ukrayna ordusu Rostov vilayətinin Taqanroq şəhərinin infrastrukturlarına “S-200” zenit raket kompleksi ilə zərbə endirib.
Azpost.info xəbər verir ki, bu barədə Rusiya Müdafiə Nazirliyi məlumat yayıb.
Ukrayna raketi Rusiya hava hücumundan müdafiə sistemləri tərəfindən havada aşkar edilərək ələ keçirilib.
Məlumata görə, vurulmuş Ukrayna raketinin qalıqları Taqanroq ərazisinə düşüb.
“Taqanroqun mərkəzində partlayış nəticəsində 9 nəfər xəstəxanaya yerləşdirilib”, – Rostov vilayətinin qubernatoru Vasili Qolubev bildirib.
Fövqəladə hallar xidməti hadisə yerində işlərini davam etdirir. Fəsadların aradan qaldırılmasına 60 xilasedici və 17 ədəd xüsusi texnika cəlb olunub.
Qolubev əlavə edib ki, partlayışın episentri Taqanroq İncəsənət Muzeyi olub. Binaya, yaxınlıqdakı qarajlara və yardımçı tikililərə ziyan dəyib. Qonşu binada üçüncü mərtəbədəki pəncərələr və çərçivələr sınıb.
Bundan əvvəl “Mash” Teleqram kanalı məlumat vermişdi ki, Taqanroqda “Çexov Sad” restoranında baş verən partlayış nəticəsində bir neçə nəfər dağıntılar altında qalıb. Qurbanların üzərində qəlpə yaraları aşkar edilib.
Qolubevin sözlərinə görə, kafedəki partlayışın ehtimal olunan səbəbi raket zərbəsidir: “15 vətəndaşın tibbi yardıma ehtiyacı olub. Rayon rəhbərliyi dəymiş ziyanı hesablayır”.
Azpost.info
