“Vaqner”in qurucusu, Putinin yaxın dostu Yevgeni Priqojin Rusiya ordusunun əsgərləri arasında saqqal saxlayanlara qarşı çıxan generalları “təlxək” adlandırıb.
Azpost.info xəbər verir ki, Priqojin bu məsələdə Çeçenistan lideri Ramzan Kadırovla həmrəy olduğunu bildirib.
”Bir dəstə təlxək ağır hərbi zəhmətdən yorulmuş döyüşçülərə saqqalı neçə dəfə qırxmaq lazım olduğunu öyrətməyə çalışır. Ramzan Axmatoviçin tənqidləri ilə razıyam”, – Priqojin bildirib. Onun fikrincə, Rusiya ordusunun qlamurlaşmasının tərəfdarı olanların hamısı 50 ilədək həbs cəzasına məhkum edilməlidir.
Qeyd edək ki, general-leytenant Viktor Sobolev rus əsgərlərinin saqqal saxlamalarına qarşı çıxıb. O, təraşın əsgərlər üçün hərbi nizam-intizamın əsas tələbi olduğunu deyib. Ramzan Kadırov Sobolevi tənqid edərək Rusiya Dumasının spikeri Vyaçeslav Volodindən onu cəbhə xəttinə göndərməyi xahiş edib. Kadırov qeyd edib ki, bəzi əsgərlər üçün saqqal dini həyat tərzinin bir hissəsidir.
General-leytenant daha sonra aydınlıq gətirib ki, o, orduda əsgərlərin saqqal saxlamasının deyil, hərbçilərin səliqəsizliyinin əleyhinədir. Onun sözlərini general-polkovnik Viktor Zavarzin şərh edərək hərbi xidmət zamanı gigiyena qaydalarına riayət olunmasının vacibliyini vurğulayıb.
“Hədəf, saqqalı qırxmaq və ya qırxmamaq deyil. Döyüşdə fasilələr zamanı mümkün olduqca gigiyena qaydalarına riayət etməkdir. Bunun üçün komandirlər hər cür şərait yaratmalıdırlar. Saqqal saxlamaq olar, amma hər şey səliqəli olmalıdır, – Zavarzin deyib.
Azpost.info
