Rusiyada məktəbə hücum edən şəxsin paltarında nasist simvolları aşkarlanıb

İjevskdəki 88 saylı məktəbdə atəş açan və sonradan intihar edən şəxsin əynində nasist simvolları olan qara köynək olub.

Azpost.info xəbər verir ki, bu barədə TASS Rusiya İstintaq Komitəsinə istinadən məlumat yayıb.

Məlumata görə, hücum edən şəxsin yanında heç bir sənədi olmayıb. Hüquq-mühafizə orqanlarının əməkdaşları hazırda onun şəxsiyyətini müəyyənləşdirirlər.

Faktla bağlı Rusiya Cinayət Məcəlləsinin 105-ci (“Ümumi təhlükəli üsulla törədilmiş iki və ya daha çox şəxsi öldürmə”) və 222-ci (“Qanunsuz silah saxlama və gəzdirmə”) maddələri ilə cinyət işi başlanıb. Hadisə yerində Rusiya İstintaq Komitəsinin müstəntiqləri və kriminalistləri işləyirlər.

Qeyd edək ki, Rusiyanın Udmurtiya Respublikasının İjevsk şəhərində məktəbdə bu gün səhər saatlarında baş verən atışma nəticəsində 13 nəfər ölüb, 20 nəfər yaralanıb.

Azpost.info