“Rusiyadan alınmış qırıcı təyyarələrin döyüş sursatları yox idi” –

Paşinyandan etiraf
21 Mart 2021 - 08:30

Ermənistanın baş naziri Nikol Paşinyan Rusiyadan “Su-30SM” döyüş təyyarələri alınarkən onların döyüş sursatları ilə təchiz edilmədiyini bildirib.

“News.am” saytının məlumatına görə, bununla da o, keçmiş baş hərbi müfəttiş general-polkovnik Movses Akopyanın verdiyi açıqlamanı təsdiqləyib.

“Bizi ittiham edirlər, deyirlər ki, təyyarələri niyə aldıq. Bəli, təyyarələr aldıq və bəli, müharibədən əvvəl raket almaq üçün vaxtımız olmadı. Ancaq siz təyyarələri alardınız, biz də raketləri alardıq”, – bu sözləri Paşinyan Ohanavan kəndinin sakinləri ilə görüşündə əvvəlki hakimiyyətə müraciətində səsləndirib.

Xatırladaq ki, Qarabağ müharibəsindən sonra istefa verən Movses Akopyan 19 noyabr 2020-ci il tarixində mətbuat konfransında verdiyi açıqlamasında Paşinyanın silah-sursat alışı ilə bağlı planı dəyişdiyini demişdi.

“Biz “Su-30SM” qırıcıları aldıq… Bizə “Su” təyyarələri lazım deyildi. Həmin təyyarələr burada sursatsız qalıblar. Rusiya hökumətinin qərarına görə, bu qırıcıların döyüş sursatlarının ikinci ölkələrə satılması qadağandır”, – deyə Akopyan bildirib.

Elə həmin gün Ermənistan Müdafiə Nazirliyi təkziblə çıxış edərək bildirmişdi ki, M.Akopyanın açıqlamaları nəinki həqiqətə uyğun deyil, hətta dövlət sirri sayılır. Nazirlik “Su-30SM” təyyarələri alınarkən onlarda silah-sursatın olmaması ilə bağlı iddiaları yanlış məlumat adlandırmışdı.