Rusiya Prezidenti Vladimir Putin Rusiyadan Azərbaycana və bir sıra digər ölkələrə nağd rubl çıxarılmasına yeni məhdudiyyət tətbiq edib.
Azpost.info bildirir ki, yeni qaydaya əsasən, fiziki şəxslər Rusiyadan Azərbaycan, Tacikistan, Özbəkistan və Avrasiya İqtisadi Birliyinə (AİB) üzv ölkələrə 1 milyon rubldan çox nağd pul çıxara bilməyəcəklər.
Müvafiq fərman sentyabrın 29-da qüvvəyə minib.
AİB-ə Rusiya ilə yanaşı Ermənistan, Belarus, Qazaxıstan və Qırğızıstan daxildir.
Yeni məhdudiyyət yalnız fiziki şəxslərlə bağlı deyil. Hüquqi şəxslər və fərdi sahibkarların qeyd olunan ölkələrə nağd rubl çıxarması da ümumi qaydada qadağan edilir.
Azərbaycana gedənlər üçün nə dəyişir?
Əsas dəyişiklik Rusiyadan Azərbaycana nağd rubl aparan fiziki şəxslərin üzləşəcəyi limitdir.
İndən sonra 1 milyon rubldan artıq nağd vəsaitin Azərbaycana aparılması mümkün olmayacaq. Bu məbləğdən yuxarı vəsaitin daşınması üçün isə fərmanda nəzərdə tutulan xüsusi istisnalardan istifadə edilməlidir.
Belə istisnalardan biri vəsaitin Rusiyanın hökumət tərəfindən müəyyən edilən beynəlxalq hava limanlarından keçirilməsi və pulun bank hesabından çıxarıldığını təsdiqləyən sənədlərin təqdim edilməsidir.
Yəni söhbət bank hesabındakı vəsaitin Azərbaycana köçürülməsinin qadağan edilməsindən yox, məhz nağd Rusiya rublunun ölkədən çıxarılmasına qoyulan məhdudiyyətdən gedir.
Bu qərar yeni deyil, amma limit sərtləşdirilib
Rusiya daha əvvəl də nağd rublun ölkədən çıxarılmasına məhdudiyyət tətbiq etmişdi. 2026-cı il aprelin 1-dən AİB ölkələrinə fiziki şəxslərin 100 min ABŞ dolları ekvivalentindən artıq nağd rubl çıxarmasına qadağa qoyulmuşdu. Hüquqi şəxslər və fərdi sahibkarlar üçün isə məhdudiyyət məbləğdən asılı olmayaraq tətbiq edilirdi.
İndi isə məhdudiyyətin coğrafiyası genişləndirilib və Azərbaycan da siyahıya daxil edilib. Eyni zamanda fiziki şəxslər üçün əvvəlki 100 min dollar ekvivalenti həddi əvəzinə 1 milyon rubl limiti müəyyənləşdirilib.
Azərbaycana təsiri nə ola bilər?
Yeni qayda Rusiyadan Azərbaycana müntəzəm səfər edən, böyük məbləğdə nağd rubl gətirən şəxslər üçün xüsusilə əhəmiyyətlidir. Bununla belə, məhdudiyyətin bank köçürmələrinə və digər nağdsız ödənişlərə avtomatik qadağa qoyması barədə söhbət getmir. Fərman konkret olaraq Rusiyanın nağd valyutasının ölkədən çıxarılmasına xüsusi rejim müəyyən edir.
Rusiyadan Azərbaycana pul gətirən şəxslər üçün əsas dəyişiklik bundan sonra böyük məbləğdə vəsaitin nağd rubl şəklində daşınmasının daha çətin və sənədləşmədən asılı olmasıdır.
S.Abdulla
