“Vaşinqton ABŞ dövlət katibi Entoni Blinkenlə Rusiya xarici işlər naziri Sergey Lavrov arasında Hindistanda keçirilən G20 sammiti çərçivəsində söhbətə görə üzr istəməyəcək. Blinken Vaşinqtonu narahat edən məsələləri qaldırıb”.
Azpost.info xəbər verir ki, bunu ABŞ Dövlət Departamentinin rəsmi nümayəndəsi Ned Prays brifinq zamanı deyib.
“Mən bilirəm ki, bizim rusiyalı həmkarlarımız hay-küy salmağa çalışırlar. Lakin qeyd edirik ki, bu, tam ikitərəfli görüş və ya onlar arasında uzun-uzadı söhbət deyil, qısa təmas idi. Biz buna görə üzr istəməyəcəyik”, – Prays bildirib.
Rusiya tərəfinin dediyinə görə, görüşü Blinken istəyib. “Sergey Viktoroviç sadəcə ünsiyyətdə olub. Danışıqlar, görüşlər və sair olmayıb”, – Rusiya Xarici İşlər Nazirliyinin sözçüsü Mariya Zaxarova bildirib.
“Reuters” yazır ki, söhbət on dəqiqəyə yaxın davam edib. Ağ Evdəki mənbə qeyd edib ki, Blinken söhbət zamanı Rusiyanın Strateji Silahların Azaldılması Müqaviləsində iştirakını dayandırmaq qərarına yenidən baxmağa çağırıb.
O, həmçinin rusiyalı həmkarını əmin edib ki, Kiyevin ehtiyacı olduğu müddətdə ABŞ Ukraynaya yardımı davam etdirəcək.
Blinken G20-nin mətbuat konfransında Lavrovla qısa söhbət etdiyini bildirib. Dövlət katibinin sözlərinə görə, o, Ukraynada hərbi əməliyyatı dayandırmağa və ədalətli və davamlı sülhə gətirib çıxara biləcək diplomatiya ilə məşğul olmağa çağırıb.
Azpost.info
