Rusiya və Belarusdan olan oliqarxlar Avropa Məhkəməsində Avropa İttifaqının (Aİ) onlara tətbiq etdiyi sanksiyalara etiraz edirlər.
Azpost.info xəbər verir ki, bu barədə Almaniyanın “Bild” qəzeti yazıb.
Məlumata görə, hazırda Brüsselin “qara siyahı”sına salınmış şəxslər və şirkətlər üzrə Aİ-nin ən yüksək məhkəməsində baxılan 61 iddia var.
Məsələn, oliqarxlar Qriqori Berezkin və Gennadi Timçenko onlara dəyən mənəvi zərərə görə kompensasiya tələb edirlər. ESN şirkətlər qrupunun sahibi olan Berezkin şikayətində nüfuzuna ciddi zərər dəydiyini, Ukrayna hadisələri ilə bağlılığının olmadığını, həmçinin Rusiya hökumətini dəstəkləmədiyini iddia edib. Mənəvi zərərə görə kompensasiya olaraq o, simvolik təzminat – 1 avro tələb edib.
İsveçrədə yaşayan, “Bank Rossiya”nın əsas səhmdarı və prezident Vladimir Putinin yaxın dostu olan Timçenko 1 milyon avro təzminat istəyir. O, hesab edir ki, Aİ yetkililəri onun Putinlə münasibətlərini qiymətləndirərkən səhvə yol veriblər.
Məhkəmə sənədlərindən göründüyü kimi, iddiaçıların siyahısında məşhur iş adamı Roman Abramoviç və “Alfa Group” maliyyə qrupunun rəhbəri Mixail Fridman da var.
Abramoviç də Timçenko kimi mənəvi ziyana görə təzminat kimi 1 milyon avro tələb edir. Abramoviçin iddiası təmin olunarsa, bu məbləğ onun “Çelsi” FK-nın satışından əldə olunan vəsait hesabına müharibə qurbanlarına kömək məqsədilə yaratdığı xeyriyyə fonduna göndəriləcək.
Rusiyalı milyarder Alişer Usmanov sanksiya siyahısından çıxarılmasına çalışsa da, Avropa Məhkəməsi onun tələblərini təmin etməkdən imtina edib.
Azpost.info
