Vergi borcu
“Sərvət İnşaat” şirkətinin külli miqdarda vergi borcu yaranıb.
Valyuta.az xəbər verir ki, şirkətin vergi borcu hazırda 283 612,41 manat təşkil edir.
“Sərvət İnşaat” 2014-cü ildə dövlət qeydiyyatına alınıb. Nizamnamə kapitalı 50 manatdır. Şirkətin qanuni təmsilçisi Servet Alpagudur.
Açıq mənbələrdə şirkət və qanuni təmsilçisi haqqında heç bir məlumat yoxdur.
Mediada gedən məlumatlardan aydın olur ki, “Sərvət İnşaat” Naxçıvanda fəaliyyət göstərir.
Xatırladaq ki, bundan əvvəl “Sərvət İnşaat” şirkətinə gömrük qaydalarını pozduğu üçün cərimə yazılıb.
Dövlət Gömrük Komitəsi şirkətə qarşı İnzibati Xətalar Məcəlləsinin 493-cü maddəsinə əsasən cərimə protokolu tərtib edib.
Daha sonra protokol baxılması üçün Naxçıvan Şəhər Məhkəməsinə göndərilib və iş hakim Gülnar Səfərəliyevanın icraatına verilib.
Şirkətin barəsində cərimə protokolu tərtib olunan maddədə deyilir ki, gömrük bəyannaməsinin və onunla birgə təqdim edilməli olan sənədlərin Azərbaycan Respublikasının Gömrük Məcəlləsində müəyyən edilmiş müddətdə müvafiq icra hakimiyyəti orqanına təqdim edilməməsinə görə fiziki şəxslər əlli manat məbləğində, vəzifəli şəxslər yüz əlli manat məbləğində, hüquqi şəxslər üç yüz manat məbləğində cərimə edilir.
